रविवार विशेष | १४ जुलै
एका एकरातील पिकावर कीटकनाशक फवारणीला दीड ते दोन तासांपेक्षा अधिक कालावधी लागतो. पिकांची वाढ होईल, तसा कीटकनाशक फवारणीचा वेळही वाढतो. आधुनिक तंत्रज्ञानाने ड्रोनद्वारे मात्र अवघ्या दहा मिनिटांत एका एकरातील पिकांवर औषध फवारणी शक्य झाली आहे. पाठीवर भलं मोठं ओझं घेऊन फवारणी करण्यापेक्षा ड्रोनच्या माध्यमातून फवारणी करण्यासाठी शेतकऱ्यांनी प्राधान्य दिलं आहे. ड्रोनच्या माध्यमातून आठ ते दहा मिनिटात एक एकरावर फवारणी होते. त्यासोबतच कीटकनाशकाची बचतही होते. अशा ड्रोन कॅमेरा ऊस पिकावर औषध फवारणी करण्यासाठी भाडेतत्त्वावर मिळत आहे.
संगमनेर तालुक्यातील मालदाड येथील कृषी पदवीधर सुप्रिया नवले यांनी परिसरातील शेतकऱ्यांची मेहनतीला पूर्णविराम देऊन सरकारच्या योजनेतून ड्रोन घेतले असून तीन चाकी गाडी, जनरेटर, बॅटरी, इत्यादी साहित्य घेऊन सुप्रिया शेतकऱ्याच्या बांधावर जाऊन १० मिनिटातच एक एकर क्षेत्र फवारणी करताहेत.
इफको कंपनीने अलीकडे नॅनो युरिया, नॅनो डीएपी, साकारिका अशी फवारणी करणारी औषधी उत्पादित केले आहेत. याला केंद्र सरकारने अधिकृत परवाना दिला आहे. या फवारणी खतांना चांगली मागणी आहे. यावेळी कंपनीच्यावतीने सदर ड्रोन भाडेतत्त्वावर देण्याची सोय करण्यात आली आहे. जुने यंत्र घेऊन काम करताना शेतकऱ्यांना विषबाधा होत असे मात्र ड्रोनद्वारे हा धोका टाळता येतो.
एका जागेवर उभे राहून एक किलोमीटर अंतरावर ती फवारणी करता येते. एकरभर शेतासाठी दहा लिटर पाणी लागते आणि यात ४० टक्के कीटकनाशकाची बचत होते. ड्रोन फवारणी यंत्राच्या माध्यमातून औषध फवारणी सोपी झाली आहे.
ड्रोनद्वारे करा औषध फवारणी…
पाठीवर १० ते २० लिटरची टाकी आणि पंप घेऊन पिकावर कीटकनाशक फवारणीचे काम खूप कष्टाचे असते. खबरदारी न घेतल्यास विषबाधेचाही धोका असतो. तर मोठ्या पिकांवर फवारणी करताना सर्पदंशाने अन्य वन्य प्राण्यांपासूनही धोका असतो. ही बाब लक्षात घेऊन शेतकऱ्यांनी ड्रोनद्वारे औषध फवारणी करावी. – सुप्रिया नवले.
