निवडून येण्याची क्षमता, मतदार संघाची परिस्थिती बघून मविआच्या बैठकीत निर्णय होणार
महाराष्ट्र संवाद न्यूज
संगमनेर – महाविकास आघाडीमध्ये लोकसभेसाठी राज्यातील 48 जागांवर चर्चा होईल त्यावेळी जागा वाटपा संदर्भातील निर्णय घेतला जाईल. निवडून येण्याची क्षमता मतदार संघाची परिस्थिती बघून निर्णय घेतला जाणार असल्याचे काँग्रेस नेते आमदार बाळासाहेब थोरात यांनी म्हटले आहे.
पत्रकार परिषद: काँग्रेस नेते आमदार बाळासाहेब थोरात यांनी शिर्डी लोकसभा मतदारसंघात संदर्भात गुरुवारी संगमनेरमध्ये आयोजित एका पत्रकार परिषदेत यासंबंधी महत्त्वाचे विधान केले.
थोरात म्हणाले, राज्यातील 48 जागा संदर्भात चर्चा होईल. त्यानंतर काही गोष्टी ठरतील. कोणी उमेदवारी जाहीर केली असं आज म्हणू शकत नाही. महाविकास आघाडी म्हणून शिर्डीच्या जागेचा निर्णय घेतला जाईल.
वाकचौरे उमेदवार असतील का? शिवसेनाप्रमुख उद्धव ठाकरे शुक्रवारी नगर जिल्ह्याच्या दौऱ्यावर येत आहे. लोकसभा निवडणुकीच्या पार्श्वभूमीवर ते शिर्डी लोकसभा मतदारसंघात कोपरगाव संगमनेरमध्ये भेटी देणार आहेत. माजी खासदार भाऊसाहेब वाकचौरे यांनी शिवसेनेत पुन्हा प्रवेश केल्याने तसेच संभाव्य उमेदवार म्हणून वाकचौरे यांच्या नावाची चर्चा शिर्डी लोकसभा मतदार संघासाठी सुरू आहे, या पार्श्वभूमीवर थोरात यांना प्रश्न विचारला असता त्यांनी वरील विधान केले.
सेना की काँग्रेस: थोरात यांच्या विधानामुळे शिर्डी लोकसभा मतदार संघाची जागा शिवसेनेकडे राहते की नव्याने होणाऱ्या जागा वाटपामध्ये ही जागा काँग्रेसला मिळते, हे येत्या काळात स्पष्ट होणार आहे. ही जागा काँग्रेसला मिळाल्यास माजी खासदार वाकचौरे शिवसेनेत राहणार की पुन्हा शिवसेनेची बंडखोरी करत उमेदवारी करणार हेही लवकरच स्पष्ट होईल. जागा वाटपात जागा शिवसेनेकडे राहिल्यास या जागेवर वाकचौरे यांनी कोणी हे देखील महाविकास आघाडीच्या जागा वाटपाच्या बैठकीनंतर स्पष्ट होणार असल्याचे दिसते.
