घोलप यांच्या पाठोपाठ शिर्डीतून पदाधिकारी ही राजीनाम्याच्या तयारीत!
महाराष्ट्र संवाद न्यूज
नाशिक – त्या ४० लोकांनी बंडखोरी केली, ते आमदार, खासदार पुन्हा निवडून येता कामा नये, असे आदेश उद्धव ठाकरे यांनी दिले होते. त्यासाठी त्यांनी मला अमरावती किंवा शिर्डी यापैकी एका लोकसभा मतदारसंघाची निवड करायला सांगितले होते. मी शिर्डीची निवड केली, पण तिथे गद्दार वाकचौरेंना उमेदवारी जाहीर केली. त्यांना उमेदवारी द्यायची होती, मग मला का तयारी करायला सांगितले? असा सवाल करीत माजीमंत्री घोलप यांनी आपली नाराजी जाहीर केली.
उपनेतेपदाच्या राजीनाम्याची घोषणा: बबनराव घोलप यांनी नाशिकमध्ये पत्रकार परिषद घेत मी शिवसेना उपनेतेपदाचा राजीनामा दिलेला असल्याचे जाहीर केले.
३५ शाखांची स्थापना: शिर्डी लोकसभा मतदारसंघात मला संपर्कप्रमुख पदाची जबाबदारी दिल्याने कामाला लागलो होतो. मी संपर्कप्रमुख झाल्यावर चांगली तयारी केली. मला कार्यकर्त्यांमध्ये उत्साह दिसला पण पदाधिकाऱ्यांमध्ये उत्साह दिसत नव्हता. त्यामुळे त्यात बदल केला, पण त्याला मुंबईतून स्थगिती दिली. यानंतरही काम सुरु होते. ३५ शाखांची स्थापना केली होती.
ठाकरेंच्या दौऱ्याची कल्पना नव्हती: उद्धव ठाकरे यांचा नुकताच शिर्डी दौरा झाला, त्या दौऱ्याची माहिती मला देण्यात आली नव्हती. दौरा मला कळवण्यात आला नाही. भाऊसाहेब वाकचौरे गद्दार होते ते शिवसेना सोडून गेले होते. वाकचौरेंनी कोर्टात केलेल्या केसेस सुरु आहेत पण त्याला पक्षात घेतले. ते वाकचौरे आता प्रचार करत असताना, कार्यकर्ते संभ्रमात आहेत. वाकचौरेंना जर उमेदवार करायचे होते, तर मला का सांगितलं? असा सवाल बबनराव घोलप यांनी केला.
नार्वेकर वाकचौरे यांना पुढे ढकलत होते: उद्धव ठाकरे यांच्या दुष्काळी पाहणी दौऱ्यात वाकचौरे यांनाच पुढे पुढे करण्यात आले. जेव्हा जेव्हा उद्धव ठाकरे कॅमेऱ्याजवळ जात होते त्यावेळी मिलिंद नार्वेकर वाकचौरेंना पुढं ढकलत होते. त्यानंतर मी घरी गेलो उद्धव ठाकरे यांच्याशी चर्चा करणार होतो पण दुसऱ्याच दिवशी सामनामध्ये माझं संपर्कपद काढून घेतल्याचे छापून आले. माझ्याशी अशी वागणूक असेल तर शिवसैनिकांचं काय असेल म्हणून मी हातानं राजीनामा लिहिला आणि व्हाटसअपवर राजीनामा उद्धव ठाकरे यांच्याकडे पाठवला, असं बबनराव घोलप म्हणाले.
पदाधिकाऱ्यांच्या राजीनाम्याची शक्यता: दरम्यान घोलप यांनी राजीनामा दिल्याने शिर्डीतील संगमनेर, अकोले, कोपरगाव, राहता येथील पदाधिकारी व शिवसैनिकांमध्ये नाराजीचे वातावरण निर्माण झाले आहे. घोलप यांच्या भूमिकेकडे पदाधिकाऱ्यांचे लक्ष लागले असून ते देखील राजीनामा देण्याच्या तयारीत असल्याचे बोलले जात आहे.
मी उद्धव ठाकरे यांना राजीनामा पाठवला आहे. खासदार संजय राऊत यांनी मला बोलावलं आहे. मी त्यांच्या भेटीला जाणार आहे. मी गेली ५५ वर्ष शिवसेनेत काम करतो आहे. १९६८ ला माझ्या शाखेचं उद्घाटन बाळासाहेब ठाकरे यांनी केलं आहे. मी ५५ वर्षे झाले, शिवसेनेत काम करत आहे, त्यांनी मला काढून टाकावं, मी बाहेर जाणार नाही.
– बबनराव घोलप
