माझा माणूस उन्हात असताना मी सत्तेच्या सावलीत कशी राहू शकते ?
महाराष्ट्र संवाद न्यूज
भगवान भक्ती गड (बीड) : माझ्या कारखान्यावर रेड झाली तेव्हा तुम्ही दोन दिवसांत 11 कोटी जमा केले. पण आज माझ्याकडे तुम्हाला बसण्यासाठी अंथरायला सतरंजीसुद्धा नाही. तुम्ही उन्हात म्हणून मी पण उन्हात आहे. माझा माणूस उन्हात असताना मी सत्तेच्या सावलीत कशी राहू शकते असे म्हणत माजी मंत्री पंकजा मुंडे यांनी त्यांच्या कारखान्यावर झालेल्या कारवाईबाबत खुलासा केला.
सावरगाव येथील भगवान बाबा भक्ती गडावर पोहचल्यावर पंकजा मुंडे भगवान बाबांचे दर्शन, आरती, कन्या पूजन करून व्यासपीठावर आल्या. पंकजा मुंडे, प्रीतम मुंडे आणि यशश्री मुंडे या तिघी बहिणी यावेळी एकत्र होत्या.
काही दिवसांपूर्वी पंकजा मुंडे यांच्या कारखान्यावर झालेल्या कारवाईनंतर आज दसरा मेळाव्यात त्या काय बोलतात याकडे सर्वांचे लक्ष लागले होते. यावेळी त्यांनी भगवान भक्ती गडावर बोलताना या देशातील शेतकरी सुखी आहे का असा सवाल सरकारला विचारत भाजपला घरचा आहेर दिला.
यावेळी मुंडे यांनी उपस्थितांना संबोधीत करताना पंकजा मुंडे म्हणाल्या की, कसं वाटतेय, कुठून कुठून आलाय तुम्ही, विदर्भातून कोण- कोण आलय, यासोबतच त्यांनी राज्यातील प्रत्येक विभागातून आलेल्यांचा आढावा घेतला.
तुम्ही सर्वजण प्रत्येक विभागातून जिल्ह्यातून तुम्ही आले आहात. माझ्यासाठी, स्व. गोपीनाथ मुंडेंसाठी आणि भगवान बाबांसाठी तुम्ही आला आहात असे म्हणत त्या उपस्थितांपुढे नतमस्तक झाल्या.
जेव्हा मी महाराष्ट्रभर शिवशक्ती परिक्रमा केली. तेव्हा मला वाटलं नव्हतं एवढं प्रेम मिळेल. पण मला त्या दिव्यतेंतून भव्यता दिसून आली. मुंडे साहेब एक वाक्य नेहमी म्हणाये की, मी माझ्या कातड्याचे जोडे जरी केले तरी या माणसांचे उपकार फेडू शकणार नाही.
मुंडे यांच्या भाषणावेळी मुंडें समर्थकांनी काहीकाळ गोंधळ घातला. त्यामुळे भाषण काहीकाळ थांबविण्यात आले होते. एवढेच नव्हे तर गोंधळ घालणाऱ्या कार्यकर्त्यांना मी राजकारण करावे का की सोडून द्यावे असा प्रश्न विचारत त्यांना शांत करण्याचा प्रयत्न केला.
येथे धनगरांसह सगळेच समाजाचे लोक आले आहेत. शेतकरी सुखी आहे का सांगा मला, देशात सगळे आलबेल आहे का मला सांगा, शेतकरी आनंदात आहेत का, विमा मिळाला का, अनुदान मिळाले का, तुम्हाला शेतात काम नाही आणि द्यायला दाम नाही. ऊसतोड कामगारांचे प्रश्न जैसे थे आहेत. तेव्हा आता पैसा वाढवून दिले पाहीजे नाही तर हा ऊसतोड मजूर ऊस तोडायला जाणार नाही असा इशाराच त्यांनी यावेळी दिला.
