महाराष्ट्र संवाद न्यूज
संगमनेर : राज्याचे माजी मंत्री आमदार बाळासाहेब थोरात यांच्या नेतृत्वाखाली संगमनेर तालुक्यातील सात पैकी दोन ग्रामपंचायती उमेदवारी अर्ज मागे घेण्याच्या अखेरच्या दिवशी बिनविरोध झाल्या. ग्रामपंचायत स्थापनेनंतर प्रथमत:च निवडणूक लागलेल्या ढोलेवाडीसह ग्रामपंचायत पठार भागातील बोरबन येथील ग्रामपंचायतीचा समावेश आहे.
या दोन्ही ग्रामपंचायतीमध्ये सरपंचपदी महिला कारभारणींची वर्णी लागली असून ढोलेवाडीच्या सरपंचपदी शालिनी ढोले तर बोरबनच्या सरपंचपदी अरुणा गाडेकर बिनविरोध निवडून आल्या आहे.
‘एक तालुका एक परिवार’ ही संकल्पना जपताना संगमनेरमध्ये होत असलेल्या सातही ग्रामपंचायतीमध्ये काँग्रेस पक्षाचे नेते, आमदार बाळासाहेब थोरात यांच्या समर्थकांमध्येच लढत होत आहे. ढोलेवाडी ग्रामपंचायतीत संगमनेर पंचायत समितीच्या माजी उपसभापती शालिनी ढोले यांची सरपंचपदी तर निशा दत्तात्रय भरीतकर, शंकर बाबुराव ढोले, वैशाली शिवाजी ढोले, सुरेखा संदीप दारोळे, प्रियशा विलास बुळकुंडे, अमोल शरद ढोले, पंकज सुभाष शिंदे, सुनील सूर्यभान मस्के यांची सदस्यपदी निवड झाली असून एका जागेसाठी मैत्रीपूर्ण लढत होत आहे.
बोरबन ग्रामपंचायतीत अरुणा बाळासाहेब गाडेकर यांची सरपंचपदी तर ज्ञानेश्वर भाऊसाहेब गाडेकर, मनीषा गणेश गडगे, सारिका किरण गाडेकर, सविता रावसाहेब मेंगाळ, केशव मारुती गाडेकर यांची निवड झाली. तर दोन जागा रिक्त आहेत. ढोलेवाडी व बोरबन ग्रामपंचायतची निवडणूक बिनविरोध करण्यासाठी शेतकरी विकास मंडळाच्या कार्यकर्त्यांनी परिश्रम घेतले.
विजयी उमेदवारांचे व निवडणूक बिनविरोध करण्यासाठी परिश्रम घेणाऱ्या सर्व कार्यकर्त्यांचे आमदार बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, दुर्गाताई तांबे, इंद्रजीत थोरात, कॅन्सर तज्ञ डॉ. जयश्री थोरात, बाजीराव खेमनर, रणजीतसिंह देशमुख, बाबा ओहोळ, अजय फटांगरे, रामहरी कातोरे आदींनी अभिनंदन केले.
काँग्रेस पक्षाचे नेते आमदार बाळासाहेब थोरात यांच्या नेतृत्वाखाली गुंजाळवाडी ग्रामपंचायतमधून ढोलेवाडी ग्रामपंचायतला वेगळा दर्जा मिळाला. ही पहिलीच निवडणूक बिनविरोध होत असल्याने हा विजय सर्वांचा आहे. या पुढील काळात आमदार थोरात यांच्या नेतृत्वाखाली अधिक विकास करू. – शालिनी ढोले.
आमदार बाळासाहेब थोरात यांच्या नेतृत्वाखाली सुसंस्कृत तालुका म्हणून संगमनेर तालुक्याची ओळख आहे. गावची एकता जपताना सर्व ग्रामस्थांनी आपल्यावर विश्वास ठेवला असून या पुढील काळात आमदार थोरात यांच्या नेतृत्वाखाली गावचा विकास अधिक वेगाने करू.
– अरुणा गाडेकर.
