अहमदनगर : राज्याच्या गृह विभागाने पोलीस दलात केलेल्या मोठ्या फेरबदलानंतर अहमदनगरच्या आर्थिक गुन्हे शाखेला नवे डीवायएसपी मिळाले होते. मात्र या बदल्यांच्या आदेशात पुन्हा नव्याने फेरबदल करण्यात आले असून आता नगर जिल्ह्यातून नाशिकला बदलून गेलेले पोलीस उपाधीक्षक संदीप मिटके यांना पुन्हा जिल्ह्यात पाठविण्यात आले आहे. आर्थिक गुन्हे शाखेत त्यांची नियुक्ती करण्यात आली आहे.
संगमनेरमधील बहुचर्चित दूधगंगा नागरी सहकारी पतसंस्थेतील चेअरमन भाऊसाहेब कुटे आणि त्याच्या नातेवाईकांनी केलेल्या अपहार प्रकरणाचा, जिल्ह्यातील बहुचर्चित नगर अर्बन बँकेतील गैरव्यवहार प्रकरण यासह अन्य आर्थिक गुन्ह्यांचा तपास नगरच्या आर्थिक गुन्हे शाखेकडे आहे. गेल्या अनेक दिवसात या तपासात कोणतीही प्रगती झाली नाही.
न्यायालयाने दूधगंगा पतसंस्था अपहार प्रकरणातील आरोपींचे अटकपूर्व जामीन अर्ज नाकारल्यानंतर देखील आरोपींपर्यंत आर्थिक गुन्हे शाखेचे अधिकारी पोहोचू शकले नव्हते. पोलीस या गुन्हेगारांना अटक करत नसल्याने तसेच या दोन्ही आर्थिक संस्थांमधील ठेवीदारांच्या ठेवी पुन्हा परत मिळत नसल्याने या बड्या प्रतिष्ठित राजकीय गुन्हेगारांना आर्थिक गुन्हे शाखेकडून अभय मिळत असल्याची चर्चा सुरू होती. दूधगंगा पतसंस्था, नगर अर्बन बँक आधी गुन्ह्यांमध्ये राजकीय प्रतिष्ठितांचा समावेश असल्याने तपास अधिकारी राजकीय दबावाखाली असल्याचे देखील चर्चा होती.
नव्याने आर्थिक गुन्हे शाखेत नियुक्ती करण्यात आलेले पोलीस उपाधीक्षक संदीप मिटके यापूर्वी शिर्डी उपविभागाचे पोलीस उपाधीक्षक होते. गृह विभागाने काढलेल्या आदेशात मिटके यांची बदली शिर्डी येथून नाशिकमध्ये सहाय्यक पोलीस आयुक्तपदी करण्यात आली होती. त्यांच्या जागेवर नव्याने पोलीस प्रशिक्षण पूर्ण झालेले उपाधीक्षक शिरीष वमने यांची नियुक्ती झाली. याशिवाय आर्थिक गुन्हे शाखेचे पोलीस उपाधीक्षक कमलाकर जाधव यांची देखील नाशिकला बदली झाली. त्यामुळे गृह शाखेचे पोलीस उपाधीक्षक हरीश खेडकर यांच्याकडे आर्थिक गुन्हे शाखेचा अतिरिक्त कार्यभार सोपविण्यात आला होता.
