संगमनेर – सहकार विभागाच्या छापेमारीत संगमनेर तालुक्यातील साकुर येथील दोन सावकारांवर कारवाई करण्यात आली आहे. या छाप्यात सहकार विभागाच्या अधिकाऱ्यांच्या हाती काही महत्त्वाचे दस्त लागल्याचे बोलले जाते. सावकाराच्या सततच्या तगाद्याला कंटाळून साकुरमधील एका दाम्पत्याने जिल्हाधिकाऱ्याकडे स्वेच्छा मरणाची परवानगी मागितली होती. त्यानंतर तातडीने वरिष्ठ पातळीवर हालचाली झाल्या आणि ही कारवाई झाली.
सहकार खात्याचे उपनिबंधक संतोष कोरे यांनी दिलेल्या माहितीनुसार दोन पथकांनी राहुल किसन डोंगरे व सचिन बन्सी डोंगरे (रा. साकुर, ता. संगमनेर, जि. अहमदनगर) यांच्या दोघा सावकारांविरोधात सावकारी अधिनियमान्वये कारवाई करण्यात आले आहे.
यासंदर्भात साकुर येथीलच संगीता व विलास दौलत वाकचौरे या दाम्पत्याने सावकाराच्या जाचातून मुक्ती मिळण्यासाठी बुधवारी (१४ फेब्रुवारी) जिल्हाधिकारी यांना स्वेच्छा मरणाची परवानगी मिळावी, अशी निवेदनाद्वारे मागणी केली. या घटनेचे गांभीर्य लक्षात घेत अप्पर जिल्हाधिकारी सुहास मापारी यांनी जिल्हा उपनिबंधक गणेश पुरी यांना अनधिकृत सावकारी करणाऱ्या सावकारांवर कारवाई करण्याचे आदेश दिले.
या आदेशानुसार शुक्रवारी ही छापेमारी करण्यात आली. तक्रारदार दांपत्याने साकूर येथील सावकार राहुल किसन डोंगरे व सचिन बन्सी डोंगरे यांच्याकडून व्यवसायासाठी व्याजाने कर्ज घेतले. ठरलेल्या रकमेच्या व्याजापेक्षा चारपट पैसे संबंधित सावकारांनी वसूल केले, तरीही ते आणखी पैशाची मागणी करत होते. ते आमचे घर बळकावण्यासाठी वेठीस धरत असल्याने माझ्या कुटुंबला स्वेच्छा मरणाची परवानगी द्या, अन्यथा आम्ही जीवन संपवून टाकू, असा इशारा विलास दौलत वाकचौरे व संगीता विलास चाकचौरे यांनी निवेदनातून दिला होता.
