अहमदनगर – सोनईजवळ चर्चच्या धर्मगुरूने दोन अल्पवयीन मुलींच्या अंगात सैतान आल्याचे सांगत या मुलींवर अत्याचार केल्याचा प्रकार समोर आल्यानंतर नगर जिल्ह्यात खळबळ उडाली होती. दरम्यान राज्य महिला आयोगाच्या सदस्य उत्कर्षा रूपवते यांनी मंगळवारी पीडित अल्पवयीन मुली आणि त्यांच्या कुटुंबीयांची भेट घेतली. तसेच सोनई पोलीस ठाण्याच्या पोलिस अधिकाऱ्यांना पुढील तपासा संदर्भात सूचना केल्या.
यावेळी त्यांच्या सोबत जिल्हा महिला बालकल्याण विभागाचे अधिकारी उपस्थित होते. रूपवते यांनी बालिका आणि महिलांवर होणारे अशा प्रकारचे आघात संतापजनक असल्याचे सांगत अतिशय हालाखीच्या परिस्थितीत जगत असलेल्या व झाल्या प्रकाराने हादरलेल्या पीडित गरीब दोन्ही अल्पवयीन मुलींना लवकरात लवकर जिल्हा बालकल्याण समिती पुढे नेण्याचे व संरक्षणाची आवश्यकता असल्याचे सांगितले.
शासनाच्या ज्या योजना या पिडीत अल्पवयीन मुलींना लागू होऊ शकतात त्या त्वरित कार्यान्वित करून देण्याच्या सूचना त्यांनी जिल्हा महिला व बालकल्याण विभागाच्या अधिकाऱ्यांना देत या मुलींची मानसिक स्थिती स्थिरावेपर्यंत आवश्यक ते समुपदेशन करण्यात यावे तसेच त्यांच्या पुढील शिक्षणाची जबाबदारी सुद्धा शासनाने घ्यावी, आरोपींना कडक शासन व्हावं यासाठी पोलीस व न्यायप्रक्रिया जलद गतीने उपलब्ध होतील यासाठी प्रयत्न करण्याच्या सूचना करण्यात आल्या.
रूपवते यांनी सोनई पोलीस ठाण्याचे सहाय्यक पोलीस निरीक्षक शेळके यांची देखील भेट घेत तपासा संदर्भात माहिती घेतली.
जिल्हा बालकल्याण समिती, पोलीस प्रशासन, जिल्हा महिला व बालकल्याण विभाग यांचा समन्वय साधून पीडित बालिकांना न्याय मिळावा यासाठी महिला आयोग सातत्याने पाठपुरावा करेल.
उत्कर्षा रूपवते (सदस्य, राज्य महिला आयोग)
