शनिवारी देवगडला (संगमनेर) भरणार भव्य अश्व प्रदर्शन आणि अश्व बाजार, सारंगखेडा पाठोपाठ राज्यातील सर्वात मोठा अश्व बाजार : रणजीतसिंह देशमुख

संगमनेर – तालुक्यातील हिवरगाव पावसा येथे श्रीक्षेत्र देवगड यात्रे निमित्ताने शनिवारी (ता. २४ फेब्रुवारी) सारंगखेडा नंतर महाराष्ट्रातील सर्वात मोठा अश्व बाजार, अश्व प्रदर्शन व अश्व स्पर्धा आयोजित करण्यात आल्याची माहिती अश्वप्रेमी असोसिएशनचे अध्यक्ष रणजीतसिंह देशमुख यांनी दिली.

देशमुख म्हणाले, सारंगखेडापाठोपाठ संगमनेरमध्ये होत असलेले हे महाराष्ट्रातील सर्वात मोठे अश्वप्रदर्शन आणि अश्व बाजार आहे. प्रदर्शनाचे हे सातवे वर्ष असून या कार्यक्रमासाठी काँग्रेस विधिमंडळ पक्षाचे नेते, आमदार बाळासाहेब थोरात, कर्नाटक राज्याचे माजी मंत्री आमदार विनय कुलकर्णी, विघ्नहर सहकारी साखर कारखान्याचे चेअरमन सत्यशील शेरकर, जयहिंदचे संस्थापक माजी आमदार डॉ. सुधीर तांबे, विधान परिषद सदस्य आमदार सत्यजित तांबे, कॅन्सरतज्ञ डॉ. जयश्रीताई थोरात, इंद्रजीत थोरात, हिवरगाव पावसाचे सरपंच सुभाष गडाख, देवगड देवस्थानचे अध्यक्ष उत्तम जाधव यांच्यासह विविध मान्यवर उपस्थित राहणार आहेत.

जगभर अश्वाच्या विविध प्रजाती आणि त्यांचे विविध गुणधर्म आहेत. अगदी शिवकालापासून अश्वांना विशेष महत्त्व आहे. संगमनेरमध्ये दरवर्षी भव्य अश्वप्रदर्शन भरवले जात असून यामध्ये विविध राज्यांमधील अनेक अश्वपालक आपले जातिवंत अश्व घेऊन सहभागी होतात. यावर्षीही भारतासह विविध देशातून अनेक जातीवंत अश्व सहभागी होणार आहेत. याचबरोबर अश्वांचे नृत्य आणि अश्वांच्या विविध स्पर्धाही होणार आहे. यावर्षीचे मुख्य आकर्षण म्हणजे महाराष्ट्रातील सर्वात उंच घोडा बिग जस्पर हाही यात सहभागी होणार आहे.

या अश्व स्पर्धा व अश्व बाजारसाठी सर्व नागरिकांनी उपस्थित राहावे असे आवाहन अध्यक्ष रणजितसिंह देशमुख, उत्तमराव जाधव, रफिक फिटर, मकरंद मुळे, यांच्यासह शिवराज्य निर्माण संघटना व संगमनेर तालुका अश्वप्रेमी असोसिएशनच्या सर्व सदस्यांच्या वतीने करण्यात आले.