राष्ट्रवादी शरदचंद्र पवार गटाची पहिली यादी जाहीर, विखेंविरोधात डाव टाकला… अहमदनगरमधून निलेश लंके फायनल; अन्य उमेदवारात या चौघांचा समावेश

शनिवार दि. ३० मार्च

राष्ट्रवादी शरदचंद्र पवार गटाने शनिवारी लोकसभेसाठीची आपली पहिली यादी जाहीर केली. गेल्या काही दिवसांपासून राज्यात चर्चेचा विषय ठरलेल्या नगर दक्षिणमधून शुक्रवारी आपल्या आमदारकीचा राजीनामा दिलेल्या निलेश लंके या राष्ट्रवादी अजित पवार गटाच्या शिलेदाराला शरद पवारांनी संधी दिली आहे. राज्यातील महत्त्वपूर्ण लढतीमध्ये या नगर दक्षिणच्या लढतीचा समावेश आहे. पहिल्याच यादीत लंके यांचे नाव जाहीर झाल्याने नगरचा सामना देखील आता ठरला आहे.

राष्ट्रवादी शरदचंद्र पवार गटाचे प्रदेशाध्यक्ष जयंत पाटील यांनी पत्रकार परिषद घेत लोकसभेसाठीची पहिली यादी जाहीर केली. अहमदनगरमधून निलेश लंके, बारामतीतून विद्यमान खासदार सुप्रिया सुळे, शिरूरमधून खासदार डॉ. अमोल कोल्हे, वर्ध्यातून अमर काळे तर दिंडोरीतून भास्कर भगरे यांचा यात समावेश आहे. सातारा, माढा, भिवंडी, बीड, रावेर या मतदारसंघातील उमेदवार अद्याप निश्चित झालेले नाही.

उपमुख्यमंत्री अजित पवार महायुतीत सामील झाल्याने नगर दक्षिणमधून लोकसभेसाठी इच्छुक असलेल्या निलेश लंके यांची मोठी अडचण झाली होती. भाजपचे विद्यमान खासदार डॉ. सुजय विखे पाटील यांना फाईट देणारा तगडा उमेदवार म्हणून लंके यांच्याकडे पाहिले जात होते. मात्र राज्यातील बदलत्या राजकीय अडचणीत सापडलेल्या लंके यांना आपल्या आमदारकीचा राजीनामा देत निवडणुकीच्या मैदानात उतरावे लागत आहे. विखें विरोधात राष्ट्रवादीचा लंकेच्या रूपाने उमेदवार मैदानात उतरल्याने आता स्वपक्षीय व मित्र पक्षांच्या नाराजीने आधीच अडचणीत सापडलेल्या खासदार विखे यांच्या समोरील डोकेदुखी आणखी वाढली आहे.

बारामती व शिरूरमधून अपेक्षेप्रमाणे अनुक्रमे खासदार सुप्रिया सुळे व खासदार डॉ. अमोल कोल्हे यांना उमेदवारी देण्यात आली आहे. या दोन्ही मतदारसंघात महायुतीने अद्याप आपला उमेदवार जाहीर केला नसला तरी बारामतीत ननंद-भावजय आणि शिरूरमध्ये डॉ. अमोल कोल्हे विरुद्ध शिवाजीराव आढळराव पाटील अशी लढत रंगण्याची चिन्हे आहे.

वर्ध्यातून अमर काळे यांना उमेदवारी देण्यात देण्यात आली आहे. येथून निलेश कराळे मास्तर निवडणूक लढण्यास इच्छुक होते. त्यांनी त्यासाठी वारंवार शरद पवार यांच्या भेटी घेत अखेरीस राष्ट्रवादी काँग्रेस शरदचंद्र पवार गटामध्ये प्रवेश देखील केला. मात्र त्यांना उमेदवारी मिळू शकली नाही. त्यांच्या ऐवजी काळे यांना उमेदवारी देण्यात आली. याशिवाय दिंडोरीमधून भास्कर भगरे शरद पवार गटाचे उमेदवार असतील.