अहमदनगर – बुधवार, दि.१ मे
निवडणूक शाखेच्या भरारी पथकाने सोमवारी सायंकाळी अहमदनगरमधील एका हॉटेलमधून साठ हजार रुपयांची रोकड ताब्यात घेतली. या संदर्भात तिघांविरुद्ध गुन्हा दाखल करण्यात आला आहे. पथकाने पकडलेल्या आरोपींमध्ये महाविकास आघाडीचे उमेदवार निलेश लंके यांच्या समर्थकासह अन्य दोघांचा समावेश असल्याचे बोलले जाते.
निवडणूक शाखेचे भरारी पथक अधिकारी शहानवाज तडवी यांना काही लोक निवडणुकीच्या संबंधाने हॉटेल यश ग्रँड मध्ये पैसे वाटप करत असल्याची माहिती मिळाली होती. त्यानंतर त्यांनी हॉटेलमध्ये जात रूम क्रमांक ४०२ मध्ये ही कारवाई केली.
दरम्यान भरारी पथकाच्या अधिकाऱ्यांनी केलेल्या कारवाईत प्रत्येकी २० हजार रुपयांची तीन पाकिटे आणि दोन मोकळी पाकीट जप्त केली. या पैशाचा हिशोब देता न आल्याने तिघांना कोतवाली पोलीस ठाण्यात नेत पोलिस कर्मचारी सतीश मारुती शिंदे यांनी दिलेल्या फिर्यादीवरून आचारसंहितेच्या भंगासह अन्य कलमान्वये गुन्हा दाखल करण्यात आल्यानंतर नोटीस बजावून सोडून देण्यात आले असल्याची माहिती देण्यात आली आहे.
राहुल झावरे, अनिकेत यादव, गोविंद चिबडे, असे गुन्हा दाखल झालेल्यांची नावे आहेत.
