शनिवार दि. १८ मे
दुचाकीवरून आपले चेहरे रुमालाने झाकून आलेल्या आलेल्या सात जणांनी सोनाराला शस्त्राचा भाग दाखवत दरोडा टाकत सराफी पेढी लुटण्याचा प्रकार पुण्यात घडला आहे. पुण्यातील वानवडीत मोहम्मदवाडी रोडवर ही घटना घडली.
शनिवारी दुपारी सराफी पेढी लुटण्याचा हा प्रकार सीसीटीव्हीमध्ये चित्रित झाला आहे. या प्रकाराने पुण्यात खळबळ उडाली असून चोरटे दुचाकीवरून पसार झाल्याने पोलिसांनी हडपसर, वानवडी, कोंढवा परिसरात नाकाबंदी करत संशयित वाहनांची तपासणी सुरू केली होती.
महम्मदवाडी रस्त्यावरील वाडकर मळा परिसरात असलेल्या बी.जी.एस. ज्वेलर्स सराफी पेढीमध्ये शनिवारी दुपारी बाराच्या सुमारास दरोड्याची घटना समोर आली आहे. शनिवारी दुपारी खरेदीच्या बहाण्याने चोरटे सराफी पेढीमध्ये शिरले होते. त्यांनी मालक आणि कर्मचाऱ्यांना शस्त्राचा धाक दाखवत जीवे मारण्याची धमकी देऊन पेढीतील दागिन्यांची लूट करत चोरटे आल्यापावली पसार झाले. या घटनेत चोरट्यांनी नेमका किती माल लंपास केला याचा अधिकृत आकडा अद्याप समोर आला नसला तरी ही रक्कम कोट्यावधी रुपयांच्या घरात असल्याचे बोलले जाते.
दरम्यान घटनेची माहिती मिळताच गुन्हे शाखेचे अतिरिक्त पोलीस आयुक्त शैलेश बलकवडे उपआयुक्त अमोल झेंडे परिमंडळ पाचचे उपआयुक्त आर. राजा तातडीने घटनास्थळी आले होते. त्यांनी तातडीने पसार झालेल्या चोरट्यांचा शोध घेण्यास सुरुवात केली.
