शुक्रवार, दि. २४ मे
बुधवार-गुरुवारी दोन दिवसात अकोले तालुक्यातील सुगावमध्ये प्रवरा नदीपात्रात बुडालेल्यांची संख्या सहावर गेली असताना संगमनेरमध्ये प्रवरा नदीपात्रात दोघा तरुणांचा पाण्यात बुडून मृत्यू झाल्याची धक्कादायक घटना शुक्रवारी सायंकाळी समोर आली आहे. प्रवरा नदीचे या वेळचे आवर्तन अनेकांच्या जीवावर बेतले आहे.
प्रचंड मोठ्या प्रमाणात उन्हाची तीव्रता जाणवत असताना नदीपात्रात आंघोळीसाठी जाणाऱ्यांची संख्या वाढली आहे. मात्र नदीपात्रात वाळू तस्करांनी केलेल्या मोठमोठ्या खोल खड्ड्यामुळे पाण्याचा पोहणाऱ्यांना अंदाज येत नदीपात्रात वाळू तस्करांनी खोदलेले हे खड्डे नागरिकांसाठी मात्र जीव घेणे ठरत आहे. वाळू तस्करी थांबविण्यात अधिकाऱ्यांपासून मंत्र्यांपर्यंत कोणालाही यश आले नसल्याने तालुक्यातील सर्वच नदीपात्रातून मोठ्या प्रमाणात वाळू तस्करी सुरूच आहे.
सुगावमधील शोध कार्य संपत नाही तोच शुक्रवारी सायंकाळी गंगामाई घाटावर प्रवरा नदीपात्रात पोहण्यासाठी गेलेल्या काही तरुणांपैकी दोघा तरुणांचा पालिकेच्या विहिरीजवळील खोल खड्डा असलेल्या पाण्यात बुडून मृत्यू झाल्याची माहिती समोर येत आहे. पाण्यात बुडाल्याची माहिती समजतात पोहणाऱ्यांनी नदीपात्रातून दोघांना बाहेर काढले. दोघाही तरुणांना उपचारासाठी रुग्णालयात नेण्यात आले मात्र त्यांचा मृत्यू झाला.
आदित्य रामनाथ मोरे (वय १७ वर्ष, रा. घुलेवाडी, संगमनेर) व श्रीपाद सुरेश काळे (वय १७ वर्ष, रा. कोळवाडे, संगमनेर) अशी या तरुणांची नावे असल्याची माहिती समजते.
