सोमवार, दि. २७ मे
नासिक पुणे महामार्ग लगत भर वस्तीत असलेल्या मोकळ्या जागेत जुगार खेळणाऱ्या चार जणांना पोलिसांनी पकडले. ही कारवाई रविवारी (दि. २६) दुपारी एक वाजेच्या सुमारास शहरातील शक्तिमान टॉवर परिसरात करण्यात आली.
राजू कचरू मिसाळ (वय ४७, रा. गल्ली क्रमांक १५, गणेशनगर, संगमनेर), नितीन सुंदरलाल ठाणेकर ( वय ४५, रा. वाडेकर गल्ली, संगमनेर), राजेंद्र जिजाबा फटांगरे (वय ४७, रा. गल्ली क्रमांक ३, जनतानगर, संगमनेर) व नीलेश चंद्रकांत अष्टेकर (वय ५०, रा. डेरे शाळेच्या पाठीमागे, रहाणे मळा, संगमनेर) अशी पोलिसांनी पकडलेल्या जुगार खेळणाऱ्यांची नावे आहेत.
पोलिसांनी या चौघा जणांकडून जुगाराचे साहित्य, मोबाइल, रोख रक्कम असा एकूण ३६ हजार रुपयांचा मुद्देमाल हस्तगत केला. या संदर्भात पोलीस ठाण्यातील पोलीस कॉन्स्टेबल विशाल कर्पे यांनी दिलेल्या फिर्यादीवरून शहर पोलीस ठाण्यात चारही जणांविरुद्ध गुन्हा दाखल करण्यात आला आहे.
असा टाकला छापा …
शहरातील नाशिक पुणे महामार्ग लगत छत्रपती शिवाजी महाराजांच्या पुतळ्याजवळ असलेल्या शक्तिमान टॉवरच्या मोकळ्या परिसरात काहीजण जुगार खेळत असल्याची माहिती पोलिसांना मिळाली, त्यानुसार पोलिस उपनिरीक्षक सुनील माळी, पोलिस कॉन्स्टेबल कर्पे यांच्यासह पोलिस कर्मचारी कारवाईसाठी तेथे पोहोचले. त्यावेळी चार जण त्यांना जुगार खेळत असल्याचे आढळून आले.
