गुरुवार दिनांक ६ जून २०२४
बोगस डॉक्टरविरुद्ध केलेल्या तक्रारीची दखल घेत तालुका आरोग्य अधिकारी आणि गटविकास अधिकाऱ्यांच्या पथकाने छापा टाकत श्रीरामपूरमध्ये कारवाई केली. कथित डॉक्टर बोगस असल्याचे उघड झाल्यानंतर त्याचा दवाखाना सील करण्यात आला आहे.
सागर अहिरे असे या बोगस डॉक्टरचे नाव असेल श्रीरामपूर तालुक्यातील माळेवाडी येथे त्याचा दवाखाना सुरू होता. या डॉक्टर विरुद्ध श्रीरामपूर तालुका पोलीस ठाण्यात गुन्हा दाखल करण्यात आला आहे. गोंधवणी (श्रीरामपूर) येथील अरुण माणिक शिंदे यांनी हा डॉक्टर बोगस असल्याबद्दल तक्रार केली होती.
या तक्रारीची दखल घेऊन गटविकास अधिकारी प्रवीण सिनारे व वैद्यकीय अधिकारी डॉ. मोहन शिंदे यांनी माळेवाडीचे समुदाय आरोग्य अधिकारी संदीप माने, आरोग्य सेवक उपकेंद्र नुरमहमंद पटेल, आशा स्वयंसेविका अर्चना मोहन, सुशीला काळे यांच्या पथकासह माळेवाडी येथील श्वास क्लिनिक या दवाखान्यावर बुधवारी छापा टाकला.
याठिकाणी अॅलोपॅथीची औषधे, इंजेक्शन, सलाईनच्या बाटल्या, तपासणी टेबल, वाफेचे मशीन आदी साहित्य आढळून आले. तसेच आहिरे हा कुठलीही वैद्यकीय पदवीधारक नसल्याचे आढळून आले. त्याने बीएचएमएसच्या चौथ्या वर्षाची हिवाळी-२०२३ परीक्षा दिली असून त्यात तो अनुत्तीर्ण झाला आहे.
त्याच्याकडे कोणतीही शासनमान्य मेडिकल कौन्सिलची व्यवसाय पदवी नसल्याचा अभिप्राय त्याने शिक्षण घेतलेल्या वैद्यकीय महाविद्यालयातून मिळाला. त्यास वैद्यकीय व्यवसाय करण्याची परवानगी नाही. कोणतीही वैद्यकीय पदवी नसताना अनधिकृतपणे रुग्ण तपासणे हा गुन्हा आहे.
त्यामुळे उंदिरगाव प्राथमिक आरोग्य केंद्राचे वैद्यकीय अधिकारी सुनील राजगुरू यांनी दिलेल्या फिर्यादीवरून तालुका पोलिसात गुन्हा दाखल करण्यात आला आहे.
