शनिवार, दिनांक ८ जून २०२४
दोघा चोरट्यांनी महिलेच्या गळ्यातील तीन तोळ्याची सोन्याची चैन हिसकावत पलायन केल्याची घटना शुक्रवारी संगमनेरमध्ये घडली. याप्रकरणी अज्ञात दोघा चोरट्याविरुद्ध गुन्हा दाखल करण्यात आला आहे.
महिलांच्या गळ्यातील दागिने लांबवण्याच्या घटना संगमनेरमध्ये वारंवार समोर येत आहेत. शुक्रवारी रात्रीदेखील साडेसात ते आठ वाजण्याच्या सुमारास शहरातील नाशिक-पुणे महामार्गालगत असलेल्या कुंथूनाथ सोसायटीमध्ये जैन मंदिराजवळ सुनिता संतोष मेहता या महिलेच्या गळ्यातील सोन्याचे तीन तोळे वजनाची चैन ओढून गाडी भरधाव वेगात नेत पळून गेले.
सुनिता मेहता यांनी या संदर्भात संगमनेर शहर पोलीस ठाण्यात दिलेल्या फिर्यादीवरून अज्ञात दोघा चोरट्याविरुद्ध गुन्हा दाखल करण्यात आला आहे.
शहराच्या विविध भागात तसेच बस स्थानकावर सातत्याने महिलांच्या गळ्यातील दागिने कळविण्याचा घटना समोर येत आहे. पोलीस दप्तरी मात्र या घटनांची नोंद केली जाते प्रत्यक्षात गुन्हेगार मात्र गावभर सीसीटीव्ही कॅमेरे लावूनदेखील पोलिसांना आढळत नाहीत. त्यामुळे पोलिसांचा गुन्हेगारांवरील वचक संपला असल्याचे चित्र सध्या तरी संगमनेरात दिसत आहे.
सोन्याचे दर सर्वसामान्यांच्या आवाक्याबाहेर मात्र पोलीस दप्तरी तीन तोळ्याची किंमत अवघे पन्नास हजार…
बाजारात सोन्याचे दर सर्वसामान्य माणसाच्या आवाक्याबाहेर गेले आहे. मात्र पोलीस ठाण्यात दाखल होणाऱ्या गुन्ह्यांमध्ये सोन्याचे दर अद्यापही अतिशय कमी दाखविले जात असल्याने प्रत्यक्षात चोरी गेलेल्या सोन्याची किंमत चार पटीहून अधिक असते. शुक्रवारच्या घटनेत देखील महिलेच्या गळ्यातून लंपास केलेल्या तीन तोळे सोन्याच्या चैनची किंमत पोलीस दप्तरी ५० हजार रुपये दाखविण्यात आली आहे. दरम्यान या घटनेसंदर्भात अधिक माहितीसाठी तपास अधिकारी पोलीस उपनिरीक्षक विठ्ठल पवार यांच्याशी संपर्क केला असता त्यांच्याकडून प्रतिसाद मिळू शकला नाही.
