रविवार, दिनांक ९ जून २०२४
पंतप्रधान नरेंद्र मोदींच्या तिसऱ्या पर्वाला आज सुरुवात होत आहे. आज सायंकाळी मोदी रालोआ सरकारमध्ये पंतप्रधानपदाची शपथ घेत असून त्यांच्यासोबत अन्य काही मंत्र्यांचा शपथविधी समारंभ होणार आहे. काही तासांवर येऊन ठेपलेल्या या शपथविधी सोहळ्यात राज्यातील सहा जणांना संधी मिळण्याची चिन्हे असून दोघा मंत्र्यांना डच्चू दिल्याचे बोलले जात आहे.
यांचा पत्ता कट … मोदी सरकार – २ मध्ये लघु आणि सूक्ष्म उद्योग खाते असलेले मंत्री नारायण राणे यांना नव्या सरकारमध्ये संधी मिळणार नसल्याचे समोर येत असल्याने त्यांची मंत्रिमंडळात स्थान मिळण्याची शक्यता मावळली आहे. राणे यांच्यासोबतच अर्थ राज्यमंत्री असलेले भागवत कराड यांना देखील नव्या मंत्रिमंडळात स्थान मिळण्याची चिन्हे नाहीत. त्यामुळे या विद्यमान दोन्ही मंत्र्यांचा नव्या मंत्रिमंडळात पत्ता कट करण्यात आला आहे.
राज्यातून यांना संधी मिळण्याची शक्यता … नव्या संभाव्य मंत्र्यांच्या नावाची चर्चा शनिवारी दिवसभर रंगली होती. यापैकी काहीजणांना दिल्लीहून फोन आले असून त्यांना तातडीने दिल्लीला उपस्थित राहण्यास सांगण्यात आले असल्याच्या बातम्या समोर येत आहे. नव्या मंत्रिमंडळात राज्यातून भाजपचे नितीन गडकरी, पियुष गोयल, रक्षा खडसे, मुरलीधर मोहोळ, शिवसेना शिंदे गटातर्फे प्रतापराव जाधव आणि रिपाईचे रामदास आठवले यांची नावे निश्चित मानली जात आहे.
अजितदादांच्या पदरी निराशा … नव्या मंत्रिमंडळ शपथविधी समारंभावेळी तूर्तास तरी राज्याचे उपमुख्यमंत्री अजितदादा पवार यांच्या पदरी निराशा आले आहे. राष्ट्रवादीच्या कोठ्यातून प्रफुल्ल पटेल अथवा सुनील तटकरे यांच्या नावाची चर्चा होती, मात्र सध्या या दोन्ही नावांवर काट मारण्यात आल्याने तूर्तास तरी अजितदादा पवारांच्या पदरी निराशा आहे.
पंतप्रधानांनी चहापानावेळी संभाव्यमंत्र्यांशी साधला संवाद … मोदी यांच्या निवासस्थानी झालेल्या चहापानाच्या बैठकीला एनडीएचे संभाव्य मंत्री उपस्थित होते. या सर्वांबरोबर मोदींनी संवाद साधला असून त्यांना शंभर दिवसांच्या रोड मॅपविषयी माहिती देत सूचना केल्या असल्याचे समोर येत आहे. या बैठकीला संभाव्य मंत्री उपस्थित होते.
मंत्रीपदाच्या शपथेसाठी या खासदारांना आले फोन … अमित शाह, नितीन गडकरी, राजनाथ सिंह, जे. पी. नड्डा, शिवराज सिंह चौहान, निर्मला सीतारमन, अर्जुनराम मेघावाल, कमलजीत सेहरावत, रक्षा खडसे, पियुष गोयल, मुरलीधर मोहोळ, ज्योतिरादित्य शिंदे, के. अन्नामलाई, मनोहरलाल खट्टर, राव इंद्रजीत सिंह, सुरेश गोपी, ज्युएल ओरम, किशन रेड्डी, बंदी संजय कुमार, गिरिराज सिंह, रवनीत बिट्टू, अन्नपूर्णा देवी, सीआर पाटिल, अजय टम्टा, एस. जयशंकर, पंकज चौधरी, कमलेश पासवान, सुधीर गुप्ता, हरदीप सिंग पुरी, सरबानंद सोनोवाल, भुपेंद्र यादव, प्रल्हाद जोशी, मनसुख मांडविय (सर्व भाजप)
एनडीएचमधील मित्र पक्ष … जीतनराम मांझी (हिंदुस्थान आवाम मोर्चा), जयंत चौधरी (राष्ट्रीय लोकदल), अनुप्रिया पटेल (अपना दल), डी. आर. चंद्रशेखर (तेलगू देसम पार्टी), के. राम मोहन नायडू (तेलगू देसम पार्टी), प्रतापराव जाधव (शिवसेना), रामनाथ ठाकुर (जनता दल युनायटेड), एच. डी. कुमारस्वामी (जनता दल सेक्युलर), सुदेश महतो (ऑल झारखंड स्टुडंट्स युनिअन), चिराग पासवान (लोक जनशक्ती पार्टी पासवान), रामदास आठवले (रिपब्लिकन पार्टी ऑफ इंडिया आठवले)
