सोमवार, दिनांक १० जून २०२४
मराठा आंदोलनासाठी शनिवारपासून उपोषण सुरू केलेले मनोज जरांगे पाटील पुन्हा एकदा आक्रमक झाले आहे. काँग्रेस नेते विजय वडेट्टीवार यांनी मराठा आरक्षण व समाजावर बोलू नये अन्यथा काँग्रेसच्या विधानसभेच्या त्यांच्यासह सर्व जागा पाडेन, असा थेट इशारा दिला आहे.
जालन्याच्या आंतरवली सराटी येथे सुरू असलेल्या मराठा आरक्षणासाठी च्या मनोज जरांगे यांच्या उपोषणास नवनिर्वाचित खासदार कल्याण काळे यांनी आज सोमवारी भेट दिली. यावेळी त्यांच्याशी संवाद साधताना जरांगे यांनी वडेट्टीवार यांना हा थेट इशारा दिला.
जरांगे म्हणाले, आमची मुले मोठी झाली पाहिजेत, त्यांच्यासाठी आमचे प्राण पणाला लावत आहोत. सरकारने आम्ही दिलेल्या व्याख्यानुसार सगेसोयरे कायद्याची अंमलबजावणी करावी, असे झाले नाही तर आम्ही कोणालाही सोडणार नाही. आगामी विधानसभा निवडणुकीत त्यांची आणखी जास्त फजिती होईल.
जरांगे यांच्या मराठा आंदोलनामुळे मराठवाड्यातील अनेक जागांवर सत्ताधारी महायुतीच्या उमेदवारांना पराभवाला सामोरे जावे लागले. विद्यमान मंत्री व जालनाचे भाजपचे उमेदवार रावसाहेब दानवे, बीडमधून माजी मंत्री पंकजा मुंडे, नांदेड मधून विद्यमान खासदार प्रतापराव चिखलीकर, परभणीतून रासपचे नेते महादेव जानकर यांचा पराभव मराठा फॅक्टर मुळे झाल्याचा दावा केला जात आहे.
