मंगळवार, दिनांक ११ जून २०२४
नाशिक विभाग शिक्षक मतदार संघाच्या निवडणुकीतून माघार घेण्यासाठी उद्या बुधवारचा (१२ जून) अंतिम दिवस आहे. त्यानंतर निवडणुकीचे चित्र स्पष्ट होणार आहे. नगर जिल्ह्यातून अपक्ष उमेदवारी अर्ज दाखल केलेल्या भाजपाच्या विवेक कोल्हे आणि डॉ. राजेंद्र विखे पाटील यांच्यापैकी कोणाची माघार होते की दोघेही महायुती आणि महाविकास आघाडीच्या उमेदवाराविरुद्ध निवडणुकीच्या रिंगणात उतरतात हे देखील स्पष्ट होणार आहे.
सोमवारी उमेदवारी अर्जाची छाननी पार पडली. ३८ उमेदवारांनी दाखल केलेल्या ५३ उमेदवारी अर्ज पैकी ३६ उमेदवारांचे अर्ज वैध ठरले. तर निवडणूक आयोगाच्या निकषानुसार अमोल बाळासाहेब दराडे आणि सारांश महेंद्र भावसार या इच्छुकांचे वय ३० वर्षापेक्षा कमी असल्याने दोघांचे उमेदवारी अर्ज बाद ठरविण्यात आले आहे. महायुतीचे उमेदवार किशोर दराडे यांनी त्यांच्यावर दाखल असलेल्या गुन्ह्यांची माहिती शपथपत्रात नमूद केली नसल्याचा आक्षेप नोंदवत नामनिर्देशन पत्र रद्द करण्याची मागणी करण्यात आली होती. मात्र निवडणूक निर्णय अधिकारी डॉ. प्रवीण गेडाम यांनी कायदेशीर तरतुदीनुसार हा आक्षेप फेटाळून लावला.
विक्रमकुमार निवडणूक निरीक्षक…
दरम्यान नाशिक विभाग शिक्षक मतदार संघाच्या निवडणुकीसाठी निवडणूक आयोगाने विक्रमकुमार यांचे निरीक्षक म्हणून नियुक्ती केली आहे. निवडणूक प्रक्रिया संदर्भात विक्रमकुमार यांच्याशी ९८२२४६२५२३ या मोबाईल क्रमांकावर किंवा ०२५३ – २९९०८२१ या दूरध्वनी क्रमांकावर संपर्क साधण्याचे आवाहन निवडणूक आयोगाने केले आहे.
निवडणूक लढविणाऱ्या उमेदवारांची प्रसिद्ध झालेली अंतिम यादी बघा झूम करून …
