रविवार ७ जुलै | अनंत पांगारकर
पोलीस उपअधीक्षक, प्रांत अधिकारी कार्यालय, संगमनेर शहर पोलीस ठाणे आणि दारूबंदी विभागाच्या कार्यालयापासून हाकेच्या अंतरावर असलेल्या छत्रपती शिवाजी महाराज व डॉ. बाबासाहेब आंबेडकर पुतळा परिसरातील शक्तिमान टॉवर्समध्ये अवैध धंदे बोकाळले असून याकडे पोलीस यंत्रणेचे दुर्लक्ष झाल्याने हॉटस्पॉट बनलेल्या या परिसरात गंभीर घटना घडण्याची चिन्हे निर्माण झाली आहे.
सुसंस्कृत म्हणून ओळखल्या जाणाऱ्या संगमनेरला अवैध धंद्यांवर नियंत्रण ठेवण्यात अयशस्वी ठरलेल्या अधिकाऱ्यांच्या अवकृपेने अवैध धंद्यांचा कलंक लागला आहे. शहरातील अवैध धंदे राजरोसपणे सुरू असून पोलिस आणि संबंधित यंत्रणांच्या एजंट मार्फत होणाऱ्या अर्थपूर्ण नात्यामुळे याकडे जाणीवपूर्वक दुर्लक्ष होत असल्याचा आरोप आहे.
विविध विकास कामे, मोठी बाजारपेठ आणि सहकारी संस्थांच्या माध्यमातून संगमनेरने राज्यात नावलौकिक प्राप्त केला आहे. एकेकाळी दंगलीचे शहर म्हणून ख्याती असलेले संगमनेर आता सुसंस्कृत शहर म्हणून उदयास आले आहे. मात्र या सुसंस्कृततेला गालबोट लागू शकेल असे अवैध व्यवसायाचे जाळे संगमनेरात मोठ्या प्रमाणात फोपावले आहे. त्यातच छत्रपती शिवाजी महाराज व डॉ. बाबासाहेब आंबेडकर या दोन पुतळ्यांच्या परिसरातील अवैध धंदे सध्या चांगलेच चर्चेत आहे. त्यामुळे या परिसरात सुरू असलेल्या अवैध धंद्यामुळे शहराच्या शांततेला गालबोट लागण्याची चिन्हे आहेत.
ज्यांच्यावर या अवैध धंद्याचा बीमोड करण्याची जबाबदारी आहे, त्या सर्वच यंत्रणा हप्तेखोरीत बरबटल्याने याकडे दुर्लक्ष करत असल्याचा आरोप आहे. परिणामी हप्तेखोरीत अडकलेले अधिकारी बदलून जातील मात्र संगमनेरकरांना याचे परिणाम भोगावे लागतील अशी स्थिती आहे.
अशी आहे स्थिती…
छत्रपती शिवाजी महाराज, मारुती मंदिर, हॉस्पिटल आणि डॉ. बाबासाहेब आंबेडकर पुतळ्यापासून काही पावलांवर शंभर मीटरच्या आत असलेली शक्तिमान टॉवर्स ही इमारत अवैध धंद्यांचा हॉटस्पॉट बनली आहे. जवळच मुस्लिम समाजाचे प्रार्थनास्थळ देखील आहे. या ठिकाणी बिंगो गेम, लोटो गेम, ऑनलाइन लॉटरी, गांजा सिगारेट, गुटखा, मटका याबरोबरच जुगार आणि अन्य गोष्टी देखील सर्रासपणे सुरू असतात. याकडे संबंधितांचे दुर्लक्ष होत असून एरवी शहरात कारवायांचा बडगा उभारणारे अहमदनगर एलसीबीचे पथक, अपर पोलीस अधीक्षकांचे पथक, पोलीस उपाधीक्षकांचे पथक आणि शहर पोलीस निरीक्षकांचे पथक यावर कारवाया का करत नाही, असा प्रश्न उपस्थित झाला आहे.
