मंगळवार, ३० जुलै
मोठ्या आवाजातील फटाके फोडणारे सायलेन्सर, कंटाळा बसविणारे सायलेन्सर, चित्रविचित्र हॉर्न वाजवत रस्त्यावर स्टंटबाजी करत रस्त्याने ये-जा करणाऱ्या नागरिकांच्या जीवाला धोका पोहोचविण्याची शक्यता निर्माण करणाऱ्या हुल्लडबाजांवर संगमनेरचे पोलीस उपअधीक्षक सोमनाथ वाघचौरे यांनी कारवाईचा हिसका दाखविला आहे.
सोमवारी संगमनेर शहरातील शासकीय विश्रामगृह ते अमृतवाहिनी कॉलेज पर्यंतच्या जुन्या मार्गावर दोन मोटरसायकलस्वारांनी स्टंटबाजी करत आपल्या दुचाकी भरधाव वेगाने नेल्या होत्या. याच दरम्यान या रस्त्यावरून जाणाऱ्या काही दक्ष नागरिकांनी या हुल्लडबाज, स्टंटबाजी करणाऱ्या तरुणांचे फोटोग्राफ्स, व्हिडिओ काढून ते संगमनेरचे पोलीस उपअधीक्षक वाघचौरे यांना व्हाट्सअपवर पाठविले होते.
बघा व्हिडिओ…
वाघचौरे यांनी हे व्हिडिओ फोटोग्राफ्स बघितल्यानंतर ताबडतोब दोन्ही मोटर सायकलस्वार तरुणांचा शोध घेण्याच्या आदेश पोलिसांना दिले. पोलीस अंमलदार राहुल डोके, राहुल सारबंदे, ट्राफिकचे पोलीस हेड कॉन्स्टेबल राजेश जगधने, पिचड, झोळे या कर्मचाऱ्यांनी अवघ्या काही वेळातच या दुचाकीस्वारांचा शोध घेत त्यांना पोलीस उपअधीक्षकांपुढे हजर केले. या हुल्लडबाज तरुणांकडील मोटार सायकल जप्त करण्यात आल्या असून कर्ण कर्कश करणारे दोन्ही मोटार सायकलचे हॉर्न तोडून टाकण्यात आले आहे. तसेच एका गाडीचे मोठा आवाज करणारे सायलेन्सर मॉडिफाइड असल्यामुळे ते देखील काढून टाकण्यात आले.
याशिवाय दोन्ही मोटार सायकल स्वारांवर गुन्हे दाखल करण्यात आले असून दोघा स्टंटबाज तरुणांकडून मोटार वाहन कायद्याखाली प्रत्येकी अडीच हजार रुपयांचा दंड वसूल करण्यात आला. त्यामुळे संगमनेरकर नागरिकांनी पोलीस उपअधीक्षक वाघचौरे यांनी केलेल्या कारवाईचे स्वागत केले आहे. पोलिसांनी या कारवाईत सातत्य ठेवण्याची देखील मागणी दक्ष नागरिकांनी केली आहे.
संगमनेरकर नागरिकांना आवाहन…
शहरातील नागरिकांना आवाहन करण्यात येत आहे की जर कोणी रस्त्यावर या पद्धतीने स्टंटबाजी करत असल्यास किंवा नियमबाह्य पद्धतीने सायलेन्सर लावून कर्णकर्कश आवाज निर्माण करत असल्यास अशा गाडीचे व चालकाचे फोटो आम्हाला शेअर केल्यास त्यांच्यावरदेखील वरील प्रमाणेच कठोर कारवाई करण्यात येईल. – सोमनाथ वाघचौरे, पोलीस उपअधीक्षक, संगमनेर-अकोले.
