गुरुवार, ०१ ऑगस्ट
महाभारतामध्ये जसा अर्जुनाला फक्त माशाचा डोळा दिसत होता, तसाच आपल्याला पक्षाने दिलेला कार्यक्रम दिसायला पाहिजे. मुख्यमंत्री एकनाथ शिंदे यांनी केलेली कामे जनतेपर्यंत पोहोचविण्याचे आवाहन विधान परिषदेच्या उपसभापती व शिवसेना नेत्या डॉ. नीलम गोऱ्हे यांनी केले.
डॉ. गोऱ्हे छत्रपती संभाजी नगर जिल्हा दौऱ्यावर असून बुधवारी सुभेदारी विश्रामगृह येथे आयोजित महिला पदाधिकाऱ्यांच्या बैठकीत त्या बोलत होत्या. संभाजीनगर जिल्ह्यातील मध्यपूर्व, पश्चिम, गंगापूर, वैजापूर, कन्नड विधानसभा क्षेत्रातील, नांदेड, बीड आणि लातूर जिल्ह्यातील महिला आघाडीच्या प्रमुख पदाधिकारी यावेळी उपस्थित होत्या.
गोऱ्हे यांनी मुख्यमंत्री माझी लाडकी बहीण योजना, एसटी बस मध्ये महिलांना पन्नास टक्के प्रवास सवलत, लेक लाडकी लखपती योजना, मुख्यमंत्री अन्नपूर्णा योजना, उच्च शिक्षणासाठी मुलींना मोफत शिक्षण, युवकांना स्टायपंड अशा योजनांची माहिती बैठकीत दिली.
विरोधक आपल्याबद्दल काय वाईट नेरेटिव्ह पसरवत आहे याकडे आपण लक्ष न देता महाभारतात जसा पोपटाचा डोळा अर्जुनाला दिसला तसाच आपल्याला पक्षाचा कार्यक्रम दिसायला हवा. महिलांचा आत्मविश्वास वाढवा यासाठी मुख्यमंत्री शिंदे यांनी पुढाकार घेतला असून मुख्यमंत्री माझी लाडकी बहीण योजना ही नुसती योजना नसून, एखाद्या महिलेला कोणी अपमानित करून बोलत असेल तर मुख्यमंत्री हे भाऊ म्हणून त्या महिलेच्या पाठीशी उभे आहेत, ही भावना त्या महिलेच्या मनात असायला हवी असे देखील डॉ. गोऱ्हे यांनी सांगितले.
प्रतिभा जगताप, रंजना कुलकर्णी, सविता किवंडे, शिल्पाराणी वाडकर, चंद्रकला बांगर, शारदा घुले, कलाबाई ओझा, सुलभा भोपळे आदी महिला पदाधिकाऱ्यांसह महिला कार्यकर्त्या उपस्थित होत्या जिल्हा समन्वयक तेजस्विनी केंद्रे यांनी बैठकीचे सूत्रसंचालन केले.
