गुरुवार, १७ ऑक्टोंबर
संगमनेर – विधानसभा निवडणुकीची धामधूम सुरू झाली असतानाच संगमनेरमध्ये अहिल्यानगर गुन्हे शाखेच्या पथकाने तब्बल ४२ लाख १५ हजार रुपयांची बेहिशोबी रक्कम हस्तगत करण्यात यश मिळविले. पोलिसांनी पकडलेली रक्कम हवाल्याची असल्याचा संशय असून त्या दृष्टीने पोलीस तपास करत आहे. 
अहिल्या नगरचे पोलीस अधीक्षक राकेश ओला यांच्या मार्गदर्शनाखाली गुन्हे शाखेचे पोलीस निरीक्षक दिनेश आहेर यांच्या पथकाने ही कारवाई केली असल्याची माहिती समोर येते. पोलीस अधीक्षकांनी विधानसभा निवडणुकीच्या पार्श्वभूमीवर जिल्ह्यात अवैध व्यावसायिकांचा, बेहिशोबी मालमत्ता बाळगणाऱ्या इसमांचा शोध घेऊन कारवाई करण्याचे आदेश दिल्यानंतर गुन्हे शाखेच्या पथकाला मिळालेल्या माहितीनुसार संगमनेरमध्ये ही कारवाई करण्यात आली.
पोलीस निरीक्षक दिनेश आहेर यांच्या मार्गदर्शनाखाली स्थानिक गुन्हे शाखेचे पोलीस उपनिरीक्षक तुषार धाकराव, पोलीस अंमलदार अतुल लोटके, अमृत आढाव, मनोज गोसावी, रमीझराजा अत्तार यांच्या पथकाने ही कारवाई केली. शहर पोलीस ठाण्यात या संदर्भात गुन्हा दाखल करण्याचे काम सुरू होते. 
पार्श्वनाथ गल्लीतील सहदेव ज्वेलर्सच्या वरच्या मजल्यावर असलेल्या खोलीत भावेश पटेल आणि आशिष सुभाष वर्मा हे त्यांच्या साथीदारासह आपल्या उत्पन्नापेक्षा जास्तीची मोठ्या प्रमाणातील रोख रक्कम शासनाचा कर बुडवून बेकायदेशीरपणे बाळगून हवालामार्फत विल्हेवाट लावत असल्याची माहिती मिळाल्याने पथकाने दुपारी संगमनेरमध्ये छापा टाकला.
पथकाने ४२ लाख १५ हजार रुपयांच्या रोकड रकमेसह मुकेशकुमार रमेशभाई पटेल (वय ३६ वर्ष रा. पार्श्वनाथ गल्ली, जैन मंदिराजवळ, संगमनेर मूळ रा. विसनगर, जि. म्हैसाणा, गुजरात), धवलकुमार जसवंतभाई पटेल (वय ३२, रा. पार्श्वनाथ गल्ली, जैन मंदिराजवळ, संगमनेर मुळ रा. विसनगर, जि. म्हैसाणा, गुजरात) यांना ताब्यात घेतले. चौकशीत त्यांनी सदरची रक्कम हवाल्याची असून ती मालक भावेश रामाभाई पटेल (रा. पार्श्वनाथ गल्ली, संगमनेर) व आशिष सुभाष वर्मा (रा. संगमनेर) यांची असल्याचे सांगितले. याप्रकरणी उशिरापर्यंत पोलीस चौकशी तसेच शहर पोलीस ठाण्यात गुन्हा दाखल करण्याचे काम सुरू होते.
