सोमवार, ०४ नोव्हेंबर
संगमनेर – छत्रपती संभाजीनगरमधून निवडणूक लढविणाऱ्या अपक्ष उमेदवाराचे रविवारी दुपारी संगमनेरमधून अपहरण झाल्याची तक्रार करण्यात आल्याने शहर पोलीस ठाण्यात शून्य क्रमांकाचे गुन्हा नोंद करण्यात आला असून पुढील तपासासाठी हा गुन्हा शून्य क्रमांकाने शिर्डी पोलिसांकडे वर्ग करण्यात आला आहे.
राजू धर्माजी शिंदे असे अपहरण झालेल्या उमेदवाराचे नाव आहे. ते छत्रपती संभाजीनगर पश्चिममधून अपक्ष उमेदवार असून निवडणूक लढवत आहे. उमेदवारी अर्ज मागे घेण्याचा आजचा अखेरचा दिवस आहे. त्यामुळे उमेदवाराच्या अपहरणामुळे राजकीय वर्तुळात कळवळ माजली आहे.
अपक्ष उमेदवार असलेले राजू धर्माजी शिंदे हे शिर्डी येथे आपल्या परिवारासह साईबाबांच्या दर्शनासाठी आले होते. रविवारी शिर्डी विमानतळ मार्गे ते संगमनेरकडे येत असताना शहरानजीकच्या समनापुर गावाजवळ त्यांच्या (एम.एच. 04 जी.एम. 4041) या गाडीला क्रेटा गाडी आडवी लावून गाडीतील सात ते आठ जणांनी त्यांना दुसऱ्या गाडीत बसून त्यांचे अपहरण केले. 
या घटनेची माहिती मिळतात त्यांचे समर्थक मंगेश काशिनाथ जाधव (रा. करोडी, छत्रपती संभाजीनगर) यांनी संगमनेर शहर पोलीस ठाण्यात धाव घेऊन अपहरणाचा गुन्हा दाखल केला आहे. ऐन माघारीच्या आदल्या दिवशी अपक्ष उमेदवाराचे अपहरण करण्यात आल्याने संगमनेर शहर पोलीस ठाण्यात वरिष्ठ पातळीवरून या संदर्भात विचारणा होत असून पोलिसांनी तात्काळ तपास सुरू केला आहे. 
दरम्यान अहमदनगर पोलीस दल आणि छत्रपती संभाजी नगर पोलीस अधीक्षक यांनी समृद्धी महामार्गावर या अपक्ष उमेदवाराचा शोध घेण्यासाठी महामार्गावर विविध पथके तैनात केली आहे. उमेदवाराचे अपहरण झाल्याने छत्रपती संभाजीनगरमध्ये देखील मोठी खळबळ उडाली आहे. पोलीस पुढील तपास करत आहे.
