महाराष्ट्र संवाद न्यूज – प्रतिनिधी
शनिवार, २३ नोव्हेंबर
राज्यातील काँग्रेसचे दिग्गज नेते आणि गेल्या चार दशकांपासून आमदार असलेले माजी मंत्री बाळासाहेब थोरात यांना त्यांच्या होम स्पीचवर पराभवाचा मोठा धक्का सहन करावा लागला आहे. शिवसेनेचे शिंदे गटाचे नवखे उमेदवार आणि राज्याचे महसूल मंत्री राधाकृष्ण विखे पाटील यांचे समर्थक असलेल्या अमोल खताळ यांनी थोरात यांचा पराभव केला आहे. 
राज्यातील बऱ्या नेत्याचा पराभव करणारे खताळ या मतदारसंघात अखेर गेमचेंजर ठरले. थोरात यांचा पराभव संगमनेरकरांसाठीच नव्हे तर राज्यातील काँग्रेससाठी धक्कादाय ठरला असून गेल्या चार दशकानंतर प्रथमता विरोधकांना या मतदारसंघात मिळालेले यश थोरात यांना आत्मचिंतन करण्यास भाग पाडणारे आहे. 
येथील सहकार महर्षी भाऊसाहेब थोरात क्रीडा संकुलात सकाळी आठ वाजता मतमोजणीला सुरुवात झाली. खताळ यांनी पहिल्या फेरीपासूनच आश्चर्यकारकरीत्या घेतलेली आघाडी शेवटच्या फेरीपर्यंत कायम राहिली. कुठेतरी ही आघाडी तुटेल आणि थोरात पुन्हा एकदा नवव्यांदा मोठ्या मताधिक्याने आमदार होतील ही संगमनेर करांची आणि थोरात समर्थकांची आशा फोल ठरली. खताळ यांच्या माध्यमातून महसूल मंत्री राधाकृष्ण विखे आणि माजी खासदार विजय विखे यांनी या तालुक्यात प्रथमतःच थोरात यांना मोठा शह देण्यात यश मिळविले आहे. 
अमोल खताळ यांच्या रूपाने संगमनेर विधानसभा मतदार संघाच्या इतिहासात प्रथमताच विरोधी पक्षाचा झेंडा फडकला आहे. गेल्या चार दशकातील आठ निवडणुकांचा अनुभव गाठीशी असलेल्या थोरात यांच्यासमोर खताळ अगदी नवखे उमेदवार होते. मात्र त्यांनी प्रचारात समोर आणलेले मुद्दे संगमनेरकरांना जसे भाऊ ले तसेच लाडक्या बहिणींनी देखील खताळ यांच्या विजयाला हातभार लावला. खताळ यांच्या प्रचारासाठी महसूल मंत्री विखे यांची यंत्रणा या मतदारसंघात राबत असताना दिसून आली. त्यामुळे विखे पिता-पुत्रांना प्रथमच चार दशकांचा हा अभेद्य किल्ला भेदता आला.
