मंगळवार २६ नोव्हेंबर – मुंबई
तुतारी आणि ट्रॅम्पेटच्या साधर्म्यामुळे पुन्हा एकदा शरद पवारांच्या राष्ट्रवादी काँग्रेसला मोठा फटका बसला आहे. दोन्ही चिन्हातील गोंधळामुळे शरद पवार यांच्या राष्ट्रवादी काँग्रेसचे नऊ उमेदवार पराभूत झाले असून या चिन्हाचा फायदा विरोधी उमेदवारांना झाला आहे.
९ जागांवर फटका – नुकत्याच पार पडलेल्या विधानसभा निवडणुकीमध्ये महाविकास आघाडीकडून शरद पवारांच्या राष्ट्रवादी काँग्रेसने राज्यात ८६ जागांवर निवडणूक लढवली होती. त्यापैकी केवळ १० जागांवर त्यांना विजय मिळवता आला. तर ९ जागांवरील उमेदवार ‘ट्रम्पेट’मुळे पराभूत झाल्याचे समोर आले आहे. राष्ट्रवादीच्या फुटीनंतर पवार गटाला तुतारी वाजवणारा माणूस हे निवडणूक चिन्ह दिले होते. लोकसभा निवडणुकीत ‘ट्रम्पेट’चे भाषांतर पिपाणी करण्यात आले होते. त्याचा दोन मतदारसंघांत पवार गटाला फटका बसला होता.
आयोगाने मागणी फेटाळली – दोन जागांवर राष्ट्रवादी काँग्रेसच्या उमेदवारांचा झालेला पराभव आणि ट्रम्पेटला मिळालेली मोठ्या प्रमाणातील मत लक्षात घेत पक्षाने ट्रम्पेट चिन्ह गोठवावे अशी निवडणूक आयोगाकडे मागणी केली होती. मात्र निवडणूक आयोगाने पवार यांच्या पक्षाची ती मागणी फेटाळली. त्यामुळे विधानसभा निवडणुकीत हे चिन्ह कायम राहिले.
अपक्षांची ट्रम्पेटला पसंती – लोकसभा निवडणुकीत ट्रम्पेट चिन्हाला मिळालेला प्रतिसाद पाहून विधानसभेला अनेक अपक्षांनी ट्रम्पेटची मागणी केली होती. तब्बल १६३ मतदारसंघांत ट्रम्पेट हे चिन्हे देण्यात आले होते. याचा फटका पुन्हा एकदा शरद पवार यांच्या राष्ट्रवादी काँग्रेसच्या उमेदवारांना बसल्याचे निवडणूक निकालानंतर समोर आले आहे.
‘ट्रम्पेट’मुळे माझा विजय – आंबेगाव मतदारसंघातील अटीतटीच्या लढतीत अजित पवार यांच्या राष्ट्रवादी काँग्रेसचे उमेदवार दिलीप वळसे पाटील निवडून आले. वळसे पाटील यांनी सोमवारी प्रसारमाध्यमांच्या प्रतिनिधींशी बोलताना आपल्याला ‘ट्रम्पेट’ चिन्हाने घेतलेल्या मतांचा लाभ झाल्याची कबुली दिली. शरद पवारांच्या देवदत्त निकम यांचा वळसे पाटलांनी १५२३ मतांनी पराभव केला तर या चिन्हावर उभ्या असलेल्या उमेदवाराला २९६५ मते मिळाली होती. त्यामुळे वळसे पाटलांचा विजय झाला.
ट्रॅम्पेटमुळे या मतदारसंघात पवारांच्या उमेदवारांना बसला फटका –
- जिंतूर मतदारसंघात शरद पवार गटाचे उमेदवार विजय भांबळे यांचा ४५५४ मतांनी पराभव झाला. ट्रॅम्पेट चिन्हावर उभ्या असलेल्या विनोद भावळे यांना ७४३० मते मिळाली.
- घनसावंगी मतदारसंघातील शरद पवार गटाच्या राजेश टोपेंचा पराभव २३०९ मतांनी झाला. ट्रॅम्पेट चिन्हाच्या उमेदवाराला ४८३० मते मिळाली.
- शहापूरमध्ये राष्ट्रवादीच्या पांडुरंग बरोरा यांचा १६७२ मतांनी पराभव झाला.येथे ट्रॅम्पेट चिन्हाच्या उमेदवाराला ३८९२ मते मिळाली.
- बेलापूरमध्ये राष्ट्रवादीच्या संदीप नाईक यांचा ३७७ मतांनी पराभव झाला. तिथे ट्रॅम्पेट चिन्हावर उभ्या असलेल्या प्रफुल म्हात्रे यांना २८६० मते मिळाली.
- अणुशक्तीनगर मतदारसंघात राष्ट्रवादी काँग्रेसच्या फाहद अहमद यांचा ३३७८ मतांनी पराभव झाला. येथे ट्रॅम्पेट चिन्हावर उभ्या असलेल्या जयप्रकाश अग्रवाल यांना ४०७५ मते मिळाली.
- आंबेगाव मतदारसंघात राष्ट्रवादीच्या देवदत्त निकम यांचा १५२३ मतांनी पराभव झाला. तिथे अजित पवारांच्या राष्ट्रवादी काँग्रेसचे दिलीप वळसे-पाटील हे निवडून आले आहेत. येथे देवदत्त शिवाजीराव निकम नावाच्या एका दुसऱ्या उमेदवाराला २९६५ मते मिळाली ज्याचे निवडणूक चिन्ह ट्रॅम्पेट होते.
- पारनेर मतदारसंघात राष्ट्रवादीच्या तुतारी चिन्हावर उभ्या असलेल्या राणी लंके यांचा १५२६ मतांनी पराभव झाला. तिथे अजित पवारांच्या राष्ट्रवादी काँग्रेसचे काशिनाथ दाते निवडून आले, तर ट्रॅम्पेट चिन्हावर उभ्या असलेल्या सखाराम सारक यांना ३५८२ मते मिळाली.
