विशेष प्रतिनिधी / मुंबई
बुधवार ११ डिसेंबर – भाजप आमदार गोपीचंद पडळकर हे राष्ट्रवादी काँग्रेसचे (शरदचंद्र पवार) अध्यक्ष शरद पवार यांच्यावर नेहमी खालच्या पातळीवर टीका करतात. मंगळवारी पडळकर यांनी माळशिरस तालुक्यातील मारकडवाडी येथे जाऊन शरद पवार यांच्याबद्दल टीका करत वादग्रस्त वक्तव्य केलं होतं. यावरून शिवसेना (ठाकरे गट) खासदार संजय राऊत यांनी पडळकरांच्या विधानाला मुख्यमंत्री देवेंद्र फडणवीस यांचा पाठिंबा आहे का? असा सवाल उपस्थित केला होता. त्यानंतर भाजपने पडळकर यांना जाब विचारत स्पष्टीकरण मागितलं आहे.
पडळकर यांनी खालच्या पातळीवर टीका करताच राज्यभर त्यांचा आणि ज्या पक्षाचे ते आमदार आहेत त्या भाजपवर सर्वत्र जोरदार टीका होत होती. तरीही भाजपकडून याची अपेक्षित दखल घेतली जात नव्हती. मात्र शिवसेना नेत्यांनी याचा थेट जाब विचारत मुख्यमंत्री पडळकर यांच्या वक्तव्याशी सहमत आहेत काय असा सवाल करताच सूत्र फिरली आणि भाजप नेत्यांनी पडळकर यांचे कान खेचले.
या मुद्द्यावरून भाजपचे प्रदेशाध्यक्ष चंद्रशेखर बावनकुळे यांनी पडळकरांना इशारा दिला आहे. शरद पवार यांच्यावर खालच्या पद्धतीची टीका करणे मान्य नाही, असं बावनकुळेंनी पडळकरांना सुनावलं आहे. “शंभर शकुनी मेल्यानंतर एक शरद पवार जन्माला आला. शंभर गावे असताना मारकडवाडीला का पुढे करण्यात आले? त्यामुळे मी आणि सदाभाऊ खोत मारकडवाडीला आलो. लोकशाही मजबूत करण्यासाठी होळकरांनचा सिंहांचा वाटा आहे. पवारांना लाथेने उधळून टाकण्यासाठी आलो आहे,” असं पडळकर म्हणाले होते.
पडळकरांच्या वक्तव्यावर संजय राऊत यांनी, शरद पवारांच्या योगदानाबद्दल महाराष्ट्राला कायम आदर आहे. देवेंद्र फडणवीस यांचे लोक अशा पद्धतीची भाषा वापरतात, धमक्या देतात. माझ्या पाठिंब्याने हे बोलतात, असं फडणवीसांनी स्पष्ट करावे, असं आव्हान संजय राऊतांनी दिलं. ही विचारणा करताच चंद्रशेखर बावनकुळे यांनीही यावर भाष्य केलं आहे. शरद पवार हे ज्येष्ठ नेते आहेत. आमची वैचारिक भूमिका वेगळी आहे. मात्र, शरद पवारांना खालच्या पातळीवर जाऊन आणि व्यक्तीगत टीका करणे मान्य नाही. टीका करणाऱ्यांना आम्ही समज देऊ, असा इशारा बावनकुळेंनी पडळकरांना दिला आहे.
