मंगळवार, ३१ डिसेंबर
पुणे – दोन कोटींच्या खंडणीप्रकरणातील आरोपी वाल्मिक कराड पुण्यात सीआयडी ऑफिसला शरण आला आहे. शरण येण्याआधी त्याचा एक व्हिडीओ पुढे आला होता. यात त्याने आपण शरणागती पत्करत असल्याची माहिती दिली आहे. मस्साजोगचे सरपंच संतोष देशमुख यांची हत्या होऊन २२ दिवस उलटले आहेत. या प्रकरणातही वाल्मिकी कराडचं नाव घेतलं जात आहे. त्या अनुषंगानेही कराडची चौकशी होणार असल्याचं सांगितलं जात आहे.
संतोष देशमुख हत्या प्रकरणाने महाराष्ट्रभर संतापाचे लाट उसळली आहे. हत्या प्रकरणाने संपूर्ण महाराष्ट्र हादरला. तसेच, राज्यातील राजकीय वातावरणही तापले होते. त्यातच खंडणीसह इतरही गंभीर आरोप वाल्मीक कराड याच्यावर आहेत. पण खंडणी प्रकरणात तो सीआयडीला हवा होता. विरोधकांनी सातत्याने कराडवर टीका केली. कराड हा मंत्री मुंडे यांचा निकटवर्तीय असल्याचा आरोप करण्यात आला होता. प्रकरण आणखीच तापल्यानंतर वाल्मिक कराड गायब झाला होता. कराडच्या शोधासाठी सीआयडीच्या ९ पथकांचे दीडशे अधिकारी त्याचा कसून शोध घेतला जात होता. अखेर वाल्मिक कराडने आज पुण्यात पोलीस आणि सीआयडीसमोर शरणागती पत्करली.
त्यामुळे आता त्याची कसून चौकशी होणार असून तपासातून अधिक माहिती समोर येणार आहे. याशिवाय देशमुख हत्या प्रकरणाचा तपासदेखील सीआयडी कडून सुरू आहे याप्रकरणी आतापर्यंत चार आरोपींना अटक करण्यात आली आहे.
हजर होण्याआधी कराडने व्हिडिओ व्हायरल करत केला मोठा दावा… “माझ्यावर केज पोलिस स्टेशनमध्ये खोटी खंडणीची फिर्यादीची दाखल झाली आहे. मला अटकपूर्वचा अधिकार असताना मी पुण्यातील पाषाण रोड येथील सीआयडी ऑफिसला शरण येत आहे. संतोष देशमुख यांच्या मारेकऱ्यांना अटक करावी आणि त्यांना फाशीची शिक्षा झाली पाहिजे. राजकीय द्वेषापोटी यात माझे नाव जोडले जात आहे. पोलिस तपासात या प्रकरणात मी दोषी आढळल्यास न्यायदेवता जी शिक्षा देईल ती भोगायला मी तयार आहे,” असे वाल्मिक कराडने या व्हिडीओत म्हटले आहे.
