शुक्रवार, ०४ जानेवारी
संगमनेर – संगमनेरमधील नासिक-पुणे मार्गावरील व्यावसायिकांच्या अतिक्रमणाचा मुद्दा चर्चेत असतानाच आता या व्यावसायिकांची रस्त्यावरील पार्किंग नागरिकांसाठी मनस्ताप ठरू लागली आहे. वाहतुकीला अडथळा ठरणारी जोशी स्वीट होम समोरील दुचाकीची पार्किंग काढण्यात यावी, अशी मागणी आरपीआयचे (आठवले पक्ष) शहराध्यक्ष कैलास कासार यांनी केली आहे. प्रशासनाकडून तात्काळ हालचाल न झाल्यास या विरोधात रस्त्यावर उतरण्याचा इशारा देखील त्यांनी दिला आहे.
पोलीस स्टेशन-पडतानी कॉम्प्लेक्सकडून येणारी वाहने, मोमीनपुरा-छत्रपती शिवाजी महाराज पुतळ्याकडून येणारी वाहने, नासिक-पुणे महामार्गावरून धावणारी वाहने जोशी स्वीट होमसमोर एकत्रित येतात. यामुळे येथे वाहतुकीचा नेहमीच खोळंबा होत असतो. अशातच जोशी स्वीट होम या दुकानासमोर अस्ताव्यस्तपणे मोठ्या प्रमाणात दुचाकीस्वार आपल्याकडील दुचाकी पार्किंग करत असल्याने रस्त्यावर वाहतुकीचा खोळंबा होत असतो.
दुचाकी, तीन चाकी, चार चाकी वाहनांच्या गर्दीत आपली वाहने रस्त्याने बाहेर काढताना चालकांना तसेच पादचाऱ्यांना मोठ्या प्रमाणात जोशी स्वीट होम समोरील या पार्किंगचा त्रास सहन करावा लागत असतो. स्वीट होम चालकाकडून या संदर्भात कोणतीही काळजी घेतली जात नसल्याने या ठिकाणी मोठ्या अपघाताची शक्यता निर्माण झाली आहे.
स्वीट होम समोरील पार्किंग अक्षरशः रस्त्यावर असल्याने वाहतूक पोलीस प्रशासन, नगरपरिषद प्रशासन देखील या रस्त्यावरील पार्किंगकडे दुर्लक्ष करताना दिसते. पायी ये-जा करणारे, वृद्ध व्यक्ती, महिला या ठिकाणी तर अक्षरशः गोंधळून गेलेले दिसतात. रस्ता ओलांडणे येथे जीवावर बेतण्यासारखे बनले आहे. या ठिकाणी यापूर्वी झालेल्या अपघातात काही जणांना आपला जीव देखील गमवावा लागला आहे.
