विशेष प्रतिनिधी / मुंबई
केज तालुक्यातील मस्साजोग गावचे सरपंच संतोष देशमुख यांच्या हत्तेचा विषय सातत्याने लावून धरणारे भाजप आमदार सुरेश धस यांनी आणखी एक मोठा दावा केला आहे. करुणा मुंडे यांच्या कारमध्ये पिस्तूल ठेवणारी व्यक्ती पोलीस दलातील आहे. त्या व्यक्तीचं नाव मला माहित आहे, असा खळबळजनक दावा धस यांनी पत्रकार परिषदेत केला आहे.
करुणा शर्मा-मुंडे ५ सप्टेंबर २०२१ रोजी परळीत गेल्या होत्या. त्या आधी त्यांनी मंत्री धनंजय मुंडे यांच्यावर अतिशय गंभीर आरोप केले होते. त्यातून बराच संघर्ष उफाळला. करुणा मुंडे परळीत असताना त्यांच्या कारमध्ये पिस्तूल आढळून आलं होतं. त्या प्रकरणात त्यांच्या विरोधात गुन्हा दाखल झाला होता. त्याच प्रकरणाचा धागा पकडत धस यांनी हा खळबळजनक दावा केला आहे.
करुणा मुंडे शर्मा यांच्या गाडीत पिस्तूल ठेवणारी व्यक्ती दुसरी तिसरी कोणी नसून ती बीड पोलीस दलातील व्यक्ती होती. साडी नेसून त्याने करुणा मुंडे यांच्या कारमध्ये पिस्तूल ठेवले. त्या पोलिसाचं नाव मला माहित आहे पण ते तुम्हाला सांगणार नाही त्याचं नाव मी पोलीस अधीक्षकांना सांगेल, असे धस म्हणाले.
पोलीस दलातील काही जणांच्या बदल्या वाल्मीक कराडने केल्या आहे. यातील काही अधिकारीच आता त्याची चौकशी करत असल्याचा दावा त्यांनी केला आहे. तपास पथकातील एकाला बदली करून कराड यांनी गडचिरोलीहून आणल आहे. त्या अधिकाऱ्यांन त्याची स्वामीनिष्ठ दाखवू नये. काही अधिकारी त्यांच्या अति संपर्कात आहे ही बाबदेखील समोर आली आहे. असे देखील धस म्हणाले.
तपास पथकातील तेली साहेबांसह अन्य काही अधिकाऱ्यांवर आपला आक्षेप नसून त्यांच्या सोबत असलेल्या आणखी काही वरिष्ठ अधिकाऱ्यांबद्दलही माझी तक्रार नाही. मात्र क्लास तीन अधिकाऱ्यांवर माझा आक्षेप आहे. मुख्यमंत्री देवेंद्र फडणवीस यांना त्याबद्दलची माहिती दिलेली नाही. त्यांनी मला त्या अधिकाऱ्यांबद्दल अधिकचे तपशील देण्यास सांगितले आहे. त्याचे तपशील मी मुख्यमंत्र्यांना देईल, असे ते म्हणाले.
