संगमनेर – केंद्रीय कृषिमंत्री शिवराजसिंह चौहान संगमनेर मार्गे त्रंबकेश्वरकडे जात असताना येथील शासकीय विश्रामगृहावर थांबले होते. संगमनेरचे आमदार अमोल खताळ यांनी यावेळी त्यांचे स्वागत केले. चौहान यांच्या दौऱ्यादरम्यान भारतीय जनता पक्षाचे ओबीसी सेलचे जिल्हा उपाध्यक्ष दीपक भगत यांना आमदार समर्थक असलेल्या भाजपच्या कार्यकर्त्यांकडून बेदम मारहाण करण्याचा प्रकार समोर आला होता.
मारहाणीत जखमी झालेल्या भगत यांनी उपचारादरम्यान दिलेल्या जबाबानंतर संगमनेर शहर पोलीस ठाण्यात आमदार खताळ समर्थक असलेल्या सुयोग गुंजाळ आणि राहुल भोईर या दोघांविरोधात शनिवारी गुन्हा दाखल करण्यात आला आहे.
केंद्रीय कृषिमंत्री शिवराजसिंह चौहान आणि संगमनेरचे आमदार अमोल खताळ हे शासकीय विश्रामगहावर उपस्थित असताना भाजपच्या एका ज्येष्ठ पदाधिकाऱ्याला खताळ समर्थकांनी धक्काबुक्की व मारहाण केल्याचे प्रकरण समाज माध्यमातून समोर आल्यानंतर त्याचे वेगवेगळे पडसाद उमटले. मारहाण करणारे आणि मारहाण झालेल्या पदाधिकाऱ्याविषयी शहरात चर्चा सुरू होती. अखेरीस रुग्णालयात उपचार घेणाऱ्या भारतीय जनता पक्षाच्या ओबीसी सेलचे जिल्हा उपाध्यक्ष दीपक भगत यांनी केलेल्या तक्रारीनंतर मारहाण झालेल्या आणि मारहाण करणाऱ्यांची नावे समोर आले आहे. या प्रकारामुळे भाजपमधील अंतर्गत गटबाजी देखील उफाळून आली आहे.
भाजपचे ज्येष्ठ नेते राधाकृष्ण विखे व माजी खासदार सुजय विखे पाटील यांचे समर्थक असलेल्या भाजपच्या अमोल खताळ यांना विधानसभा निवडणुकीत अचानकपणे शिवसेना शिंदे गटाकडून उमेदवारी देण्यात आली होती. भाजपचाच कार्यकर्ता शिवसेनेकडून आमदार झाल्याने भाजपमधील काही पदाधिकारी, कार्यकर्ते आमदार खताळ यांच्यासोबत असल्याने पक्षात गटबाजी निर्माण झाली आहे. त्याची परिणती मागील काही दिवसात सोशल मीडियावर टाकण्यात आलेल्या पोस्टवरून भाजपच्या ज्येष्ठ पदाधिकारी असलेल्या भगत यांना विश्रामगृहात आणि बाहेर धक्काबुक्की शिवीगाळ आणि मारहाण करण्यात आली. या मारहाणीच्या बातम्या प्रसिद्ध झाल्या. त्यानंतर अशी कुठलीच घटना घडली नसल्याचा निर्वाळा काही मंडळींनी परस्पर दिला.
मात्र भाजपच्या ज्येष्ठ पदाधिकारी आणि पक्षाकडून या प्रकाराची गंभीर दखल घेण्यात आली. यातूनच भाजपचे संघटन मंत्री असलेले रवी अनासपुरे यांनी देखील रुग्णालयात जाऊन भगत यांची भेट घेत तब्येतीची विचारपूस केली. आता मात्र या संदर्भात भाजपचे ज्येष्ठ पदाधिकारी असलेल्या दीपक भगत यांच्या जबाबावरून हा गुन्हा नोंदविण्यात आला आहे.
भगत हे केंद्रीय मंत्री शिवराजसिंह चौहान यांच्या स्वागतासाठी विश्रामगृहावर गेले असता ही घटना झाली आहे. मंत्री चौहान विश्रामगृहात असताना विश्रामगृहाच्या पायऱ्या उतरत असताना सुयोग गुंजाळ आणि राहुल भोईर या दोघांनी त्यांना धक्का दिला. त्यावरून त्यांनी धक्का देऊ नका, माझी तब्येत बरी नाही असे त्यांना सांगितले. त्यानंतर चौहान त्र्यंबकेश्वरकडे जाण्यासाठी रवाना झाले. त्यानंतर विश्रामगृहाच्या बाहेरच असलेली मोटरसायकल घेत असताना पुन्हा या दोघांनी दीपक भगत यांना खाली पाडून लाथा बुक्क्यांनी मारहाण केली.
त्यामुळे भगत यांना त्रास झाला. तसेच त्यानंतर दुसऱ्या दिवशी भगत यांना अधिकच त्रास होऊ लागल्याने ते येथील खाजगी रुग्णालयात देखील दाखल झाले आहेत. त्यांनी दिलेल्या जबाबावरून सुयोग गुंजाळ आणि राहुल भोईर या दोघांवर गुन्हा दाखल करण्यात आला आहे.
