विशेष प्रतिनिधी / मुंबई
बीडमधील मस्साजोगचे सरपंच संतोष देशमुख यांच्या हत्येप्रकरणी राज्यातील सर्वपक्षीय नेत्यांच्या शिष्टमंडळाने सोमवारी राज्यपाल सी. पी. राधाकृष्णन यांची भेट घेतली. देशमुख यांची निर्घृण हत्या आणि सुरू असलेल्या खंडणीखोरीच्या कारवायांमुळे बीडमध्ये कायदा आणि सुव्यवस्था अस्तित्वात राहिलेली नाही, असा आरोप शिष्टमंडळाने केलाय. या प्रकरणात राजकीय हस्तक्षेप होण्याची शक्यता लक्षात घेऊन मंत्री धनंजय मुंडे यांच्या मंत्रिपदाचा तातडीने राजीनामा घेण्यात यावा, अशी प्रमुख मागणी यावेळी शिष्टमंडळाने राज्यपालांकडे केलीय.
माजी खासदार संभाजीराजे यांच्या नेतृत्वाखाली राज्यपालांना भेटलेल्या या सर्वपक्षीय शिष्टमंडळात विधान परिषदेचे विरोधी पक्ष नेते अंबादास दानवे, विधानसभेचे माजी विरोधी पक्षनेते विजय वडेट्टीवार, खासदार बजरंग सोनवणे, आमदार सुरेश धस, आमदार जितेंद्र आव्हाड, आमदार संदीप क्षीरसागर, ज्योती मेटे यांचा समावेश होता.
या प्रकरणात पक्षपातीपणा होत असल्याचा संशय असल्याने आणि आरोपींना राज्य सरकारकडून कथित पाठिंबा मिळत असल्याने नागरिकांचा विश्वास उडाला आहे. यामुळे राज्यपालांनी तातडीने हस्तक्षेप करावा अशी मागणी करण्यात आली.
कायद्याचे राज्य ही भावना दृढ होण्यासाठी अपहरण, खंडणी आणि खून प्रकरणाचा सूत्रधार वाल्मीक कराड यांच्याविरुद्ध बीएनएस १०३ अन्वये खुनाचा गुन्हा दाखल करून खटला जलदगती न्यायालयात चालवावा. कायद्याची अंमलबजावणी करणाऱ्या अधिकाऱ्यांची जबाबदारी निश्चित करून कर्तव्यात कुचराई करणाऱ्या पोलीस कर्मचाऱ्यांवर कारवाई करावी. बीड मधील रहिवाशांच्या सुरक्षिततेची खात्री करावी आणि खंडणी व गुंडगिरीला आळा घालण्यासाठी पुढाकार घ्यावा, अशा मागण्या शिष्टमंडळाने केल्या आहे.
राज्यपालांना भेटल्यानंतर संभाजीराजे म्हणाले, ही माणुसकीची हत्या आहे. त्यामुळे या प्रकरणात जातीच्या पलिकडे जाऊन देशमुखांच्या मारेकऱ्यांना शिक्षा होण्यासाठी सर्वांनी प्रयत्न करण्याची गरज आहे. मराठा-वंजारी असा वाद करण्याची गरज नाही. आम्ही या प्रकरणात राज्यपालांनी लक्ष घालावे, अशी मागणी केली. राज्यपालांनी या प्रकरणात लक्ष घालण्याचे आश्वासन दिल. पुरोगामी महाराष्ट्रात शाहू फुले आंबेडकरांचा विचार जिवंत ठेवण्यासाठी जातीपातीच्या पुढे जाण्याची गरज आहे.
धनंजय मुंडे यांनी राजीनामा देण्याची गरज आहे. यापूर्वी ए. आर. अंतुले, मनोहर जोशी, अशोक चव्हाण, आर. आर. पाटील अशा विविध नेत्यांनी लोकांचा आक्रोश पाहून राजीनामा दिला होता. आता धनंजय मुंडेंना सरकार, अजित पवार का संरक्षण देत आहेत, असा प्रश्न त्यांनी विचारलाय.
आमदार जितेंद्र आव्हाड यांनी बीडमध्ये यापूर्वी झालेल्या प्रकरणांचा तपास होण्याची गरज व्यक्त केलीय. मराठा वंजारी हा वाद करू नये. सरकारने मुंडेंना वाचवण्याचा प्रयत्न करू नये. चौकशी अधिकाऱ्यांचे आरोपी सोबत संबंध आहे त्यांचे इंटरेस्ट आहे त्यामुळे या प्रकरणातील चौकशी अधिकारी तात्काळ बदलावी अशी मागणी अंबादास दानवे यांनी केली.
