नागपूर – राज्यात महायुतीची सत्ता स्थापन होऊन देखील अद्यापपर्यंत पालकमंत्र्यांचा पेच सुटू शकलेला नाही. २६ जानेवारीचा प्रजासत्ताक दिन समोर असताना देखील अद्यापही पालकमंत्री निवडीस मुहूर्त लागू शकलेला नाही. पालकमंत्री निवडीवरून महायुतीत मतभेद असल्याचे बोलले जात आहे, या पार्श्वभूमीवर महसूल मंत्री व भाजप प्रदेशाध्यक्ष चंद्रशेखर बावनकुळे यांनी मोठे भाष्य करत २६ जानेवारी पूर्वी सर्व जिल्ह्यांच्या पालकमंत्र्यांचे नाव जाहीर झालेले असेल असं म्हटले आहे.
शुक्रवारी नागपुरात मंत्री बावनकुळे पत्रकारांशी बोलत होते. ते म्हणाले, पालकमंत्री नियुक्तीचा कोणताही पेच नाही. महायुतीचे सरकार असल्याने घटक पक्षांना विचारात घेऊन निर्णय घ्यावा लागतो. येत्या २६ जानेवारीपूर्वी सर्व जिल्ह्यांच्या पालकमंत्र्यांचे नाव जाहीर झालेले असेल.
यापूर्वी बावनकुळे यांनी १५ किंवा १६ जानेवारीपर्यंत पालकमंत्रीपदाचा विषय सुटलेला असेल, असा दावा केला होता. आता त्यांनी २६ जानेवारी पूर्वी पालकमंत्री जाहीर झालेले असतील असे म्हटले आहे.
नागपूरमध्ये पत्रकारांनी पालकमंत्रीपदाबाबत विचारले असता बावनकुळे म्हणाले, फार काळ प्रतीक्षा करावी लागणार नाही. पालकमंत्री नियुक्तीचा मुख्यमंत्र्यांचा अधिकार आहे. ते त्यासंदर्भात लवकरच निर्णय घेतील.
ओबीसी आरक्षणासंदर्भात सर्वोच्च न्यायालयाचा निकाल जानेवारीअखेर येणे अपेक्षित आहे. त्यानंतर राज्यातील महापालिका, जिल्हा परिषद, नगरपरिषदांच्या निवडणुका होऊ शकतील. दहावी, बारावीच्या परीक्षा झाल्यानंतर निवडणूक कार्यक्रम जाहीर करण्याची विनंती राज्य सरकारतर्फे केली जाईल, असेही बावनकुळे म्हणाले.
बावनकुळे यांनी शुक्रवारी नागपूर जिल्हा परिषदेचा आढावा घेतला. नागपूर जिल्हा परिषदेची मुदत शनिवारी संपत आहे. येथे प्रशासक नियुक्तीपूर्वी बावनकुळे यांनी आढावा बैठक घेतली. तसेच नागपूर महापालिकेतही बावनकुळे यांनी सर्व अधिकारी वर्गाची बैठक घेतली. पालिकेअंतर्गत होणाऱ्या सर्व कामांचा आढावा त्यांनी घेतला. तसेच, आणखी प्रभावी काम करण्यासंदर्भात सर्वांना सूचना केल्या. 
