पतंगीचा मांजाने दुचाकीवरील दोघे जखमी, एकाची प्रकृती चिंताजनक; दोन दिवसानंतरही गुन्हा दाखल नाही

संगमनेर – दुचाकीवरून नाशिक पुणे मार्गाने संगमनेरकडे येणारे दोघेजण रस्त्यात आडव्या असलेल्या पतंगीच्या मांज्याला अडकून जखमी झाले आहे. यातील एकाची प्रकृती चिंताजनक असून दुसरा किरकोळ जखमी झाला आहे. जखमींवर संगमनेर मधील खासगी रुग्णालयात उपचार सुरू आहे. दरम्यान शुक्रवारी दुपारी घडलेल्या या घटने संदर्भात शनिवारी सायंकाळपर्यंत संगमनेर शहर पोलीस ठाण्यात कोणताही गुन्हा दाखल झाला नव्हता.अनिकेत संजय कटारनवरे (वय २२ वर्ष रा. सिन्नर, जि. नाशिक) व प्रफुल्ल घुसळे (वय २८ वर्ष रा. संगमनेर) अशी दोघा जखमींची नावे असून अनिकेत कटारनवरे याची प्रकृती चिंताजनक असून मांजामुळे त्याच्या गळ्याला मोठी जखम झाली असल्याची माहिती वैद्यकीय अधिकाऱ्यांनी दिली.
शुक्रवारी सायंकाळी नासिक-पुणे महामार्गावर संगमनेरच्या बाह्यवळण रस्त्यावर कृष्णा लॉन्ससमोर ही घटना घडली. दरम्यान या संदर्भात संगमनेर शहर पोलीस ठाण्यात या संदर्भात संपर्क साधला असता शनिवारी सायंकाळपर्यंत कोणताही गुन्हा दाखल करण्यात आलेला नव्हता. लाईट नसल्याच्या कारणावरून गुन्हा दाखल करण्यास विलंब होत असल्याची माहिती महिला पोलीस कर्मचाऱ्यांनी दिली.
अनिकेत कटारनवरे व प्रफुल्ल घुसळे हे दोघेजण शुक्रवारी सायंकाळी दुचाकीवरून संगमनेरकडे येत असताना महामार्गावर ही दुर्घटना घडली. अनिकेत कटारनवरे याच्या गळ्याला श्वासनलिकेजवळ मोठ्या प्रमाणात इजा झाल्याने त्याला व्हेंटिलेटरवर ठेवण्यात आले आहे. अनिकेत हा विखे पाटील फाऊंडेशनच्या अहिल्यानगर येथील महाविद्यालयात शिक्षण घेत आहे.
या संदर्भात अनिकेतचे वडील संजय कटारनवरे म्हणाले, मुलाला गंभीर जखम झाली असून आत्तापर्यंत प्रशासनातील कोणीही अधिकारी कर्मचारी रुग्णालयाकडे फिरकले नसून आमची साधी चौकशी देखील करण्यात आली नाही. यासंदर्भात पोलिसांना माहिती दिल्यानंतर त्यांनी आम्हाला आरोपीचा शोध घेण्यास सांगितले. आमची परिस्थिती अतिशय हलाखीची असून उपचारासाठी आर्थिक मदतीची गरज आहे. दात्यांनी ९८५०७४९०१२ या क्रमांकावर संपर्क साधण्याचे आवाहन करण्यात आले आहे.