संगमनेर –
१६ जानेवारीपासून मोठ्या गर्दीत सुरू असलेल्या लायन्स क्लब संगमनेर सॅफ्रॉन सफायरच्या बिझनेस एक्स्पोसमोर सोमवारी रात्री एका तरुणाकडून गोळीबार करण्यात आला असल्याची चर्चा मोठ्या प्रमाणात सुरू आहे. मोठ्या गर्दीत हा प्रकार घडल्याने मोठा अनर्थ निर्माण झाला असता. त्यामुळे गोळीबार करणारा हा तरुण कोण असा प्रश्न उपस्थित झाला आहे.
प्रश्नचिन्ह झाले निर्माण…
दरम्यान या संदर्भात पोलिसांनी असा प्रकार घडला नसल्याचे म्हटले आहे. हजारो लोकांसमोर घडलेला हा प्रकार नेमका काय होता असा प्रश्न यामुळे उपस्थित झाला आहे.
एक्स्पोसमोर गर्दीत घडला प्रकार…
शहरातून जाणाऱ्या जुन्या पुणे-नाशिक महामार्गावर असलेल्या मालपाणी लॉन्सवर गेल्या काही दिवसापासून लायन्स क्लब संगमनेर सॅफ्रॉन सफायरचा बिझनेस एक्स्पो मोठ्या गर्दीत सुरू आहे. त्यातच रस्त्यावरील फुटपाथ वर एक्स्पोचे स्टॉल मांडण्यात आले आहे आणि त्यापुढे भर रस्त्यात दुचाकीची पार्किंग असल्याने दुपारपासून हा रस्ता रात्री उशिरापर्यंत वाहतुकीच्या कोंडीत सापडलेला असतो.
पोलिसांनी वस्तुस्थिती समोर आणावी…
अशातच हा प्रकार घडल्याने याची शहरात मोठी चर्चा सुरू आहे. समाज माध्यमावर देखील या संदर्भात चर्चा सुरू असल्याने संगमनेर पोलिसांनी वेळीच यासंदर्भात वस्तुस्थिती समोर आणण्याची मागणी होत आहे.
नेमकं काय घडलं…
बिझनेस एक्स्पोसमोर सोमवारी रात्री साडेदहा वाजण्याची सुमारास दोन गट एकमेकांसमोर आले होते. त्यांच्या बाचाबाची होऊन शिवीगाळ झाल्याने हा वाद टोकाला गेला होता. यातच एका तरुणाने आपल्या जवळील गावठी कट्ट्यातून रस्त्यावर गोळीबार केल्याने लोक सैरावैरा पळू लागले होते. मात्र याकडे पोलिसांनी दुर्लक्ष केल्याने आश्चर्य व्यक्त होत असल्याचे वृत्त दैनिक ‘सार्वमत’ने दिले आहे.
लवकरच तरुणाला ताब्यात घेणार…
दरम्यान संबंधित तरुणाने गावठी बंदूक नव्हे तर लाइटर काढले होते. पोलिसांनी या तरुणाला ताब्यात घेण्याचा प्रयत्न केला मात्र तो तिथून पसार झाला. त्यानंतर त्याच्या आई-वडिलांना पोलिसांनी चौकशीसाठी पोलीस ठाण्यात बोलावले होते. याशिवाय आणखी काही तरुणांनाही चौकशीसाठी बोलावण्यात आले होते. संबंधित तरुणाला लवकरच ताब्यात घेण्यात येईल. – रवींद्र देशमुख पोलीस निरीक्षक संगमनेर शहर पोलीस ठाणे.
