थोरात कारखान्याचे कार्यकारी संचालक जगन्नाथ घुगरकर यांचा खासदार शरदचंद्र पवार यांच्या हस्ते पुरस्कार देत सन्मान!

पुणे –

पुण्याच्या वसंतदादा शुगर इन्स्टिट्यूट मध्ये संगमनेरच्या सहकार महर्षी भाऊसाहेब थोरात सहकारी साखर कारखान्याचा गौरव करण्यात आला असून कारखान्याचे कार्यकारी संचालक जगन्नाथ घुगरकर यांचा खासदार शरदचंद्र पवार यांच्या हस्ते उत्कृष्ट कार्यकारी संचालकांचा पुरस्कार देत सन्मान करण्यात आला आहे.

पुण्याच्या मांजरी येथील वसंतदादा शुगर इन्स्टिट्यूट मध्ये २०२३-२४ यावर्षीचे विविध पुरस्कार खासदार शरदचंद्र पवार यांच्या हस्ते देत मान्यवरांचा सन्मान करण्यात आला. यावेळी राज्याचे उपमुख्यमंत्री अजित पवार, सहकार मंत्री बाबासाहेब पाटील, राज्याचे माजी मंत्री बाळासाहेब थोरात, आमदार जयंत पाटील, माजी मंत्री हर्षवर्धन पाटील, दिलीप वळसे पाटील, राजेश टोपे, खासदार विशाल पाटील, मंत्री शिवेंद्रराजे भोसले, विवेक कोल्हे, नरेंद्र घुले, जयप्रकाश दांडेगावकर आदींसह राज्यभरातून मान्यवर उपस्थित होते.

२०२३-२४ चा उत्कृष्ट कार्यकारी संचालक पुरस्कार थोरात कारखान्याचे कार्यकारी संचालक जगन्नाथ घुगरकर यांना सपत्नीक देत त्यांचा यावेळी सन्मान करण्यात आला. १ लाख रुपये रोख असे या पुरस्काराचे स्वरूप आहे.

शरद पवार म्हणाले, सहकार चळवळी राज्याच्या ग्रामीण विकासाचा पाया असून यामध्ये सहकारी साखर कारखान्यांची भूमिका महत्वपूर्ण राहिली आहे. प्रत्येक कारखान्याने आपला वेगळा ठसा या क्षेत्रात उमटविला असून यापुढील काळातही हा सहकार टिकविण्याची जबाबदारी सर्वांवर असेल. सहकार महर्षी भाऊसाहेब थोरात यांनी वाढविलेली संगमनेर मधील सहकार चळवळ देशासाठी दिशादर्शक ठरले असल्याचे ते म्हणाले.

उपमुख्यमंत्री पवार म्हणाले, राज्यात साखर कारखानदारांना कारखाने चालवताना अनेक अडचणींचा सामना करावा लागतो. यावर मात करून हा सहकार टिकवावा लागणार आहे. सरकारने कारखानदारीचे जवळचे नाते असून भविष्यात साखरेचे दर वाढणार असल्याचे संकेत देत प्रत्येक कारखान्यात आर्थिक शिस्त महत्त्वाचे असल्याचे ते म्हणाले.

यावेळी सहकार मंत्री बाबासाहेब पाटील, बाळासाहेब थोरात, हर्षवर्धन पाटील, जयंत पाटील आदींनी आपले मनोगत व्यक्त केले.

पुरस्काराची रक्कम भगवान बाबा गडाच्या विकासासाठी – पुरस्कारार्थी घुगरकर

मिळालेला पुरस्कार हा कारखान्याचे सर्व कर्मचारी अधिकारी आणि सर्वांच्या परिश्रमाचा आहे. पुरस्काराचे श्रेय सर्वांना जाते. वसंत दादा शुगर इन्स्टिट्यूटने दहा हजारावरून या पुरस्काराची रक्कम एक लाख रुपयावर नेली आहे. पुरस्काराची ही रक्कम आपण भगवान बाबा गडाच्या विकासासाठी देणार असल्याचे जगन्नाथ घुगरकर यांनी सांगितले.