संगमनेर, दि. १८ फेब्रुवारी –
संगमनेर तालुक्यातील समनापुर येथे सुरू असलेल्या कादर शहावली संदल दरम्यान दोन गटात झालेल्या दगडफेकीत एक जण जखमी झाला असून सात जणांविरोधात संगमनेर शहर पोलीस ठाण्यात भारतीय न्याय संहितेच्या विविध कलमा अंतर्गत गुन्हा दाखल करण्यात आला आहे.
तालुक्यातील समनापूर येथे सुरू असलेल्या यात्रे दरम्यान दोन गटांमध्ये जोरदार हाणामारी झाल्याची घटना सोमवारी रात्री नऊ वाजेच्या सुमारास समनापुर येथील मारुती मंदिरासमोरील मोकळ्या पटांगणात घडली. ज्यावेळी दोन्ही गटात दगडफेक करण्यात आली.
यासंदर्भात शहर पोलिसांकडून मिळालेली माहिती अशी, गॅरेज व्यवसाय करणारा पंकज गोरक्षनाथ नेहे (वय ३२, रा. चांडे वस्ती, निळवंडे रोड, समनापुर ता. संगमनेर जि. अहिल्यानगर) हा तरुण सोमवारी (१७ फेब्रुवारी) रात्री समनापुर येथील मारुती मंदिरासमोर कादर शहावली संदल पाहण्यासाठी गेला होता. यावेळी तेथे दोन गटात भांडण होऊन दगडफेक झाली. एका जमावाने दगडफेक केल्याने नेहे याच्या डाव्या पायाच्या नळीला दगड लागला. यात तो जखमी झाला.
जखमी झालेल्या नेहे याच्यावर संगमनेर शहरातील खाजगी रुग्णालयात उपचार करण्यात येत आहे.
या दरम्यान जखमी असलेल्या नेहे याचा रुग्णालयात पोलिसांनी जबाब नोंदविल्यानंतर शहर पोलीस ठाण्यात त्याच्या फिर्यादीवरून मंगळवारी दुपारी सनी गोविंद कडलग, महेश मच्छिंद्र रोकडे, रोहित रोकडे, नटराज जाधव, चैतन्य संजय बोराडे, रुद्र राजु रोकडे, शिवा राजु रोकडे यांच्याविरुद्ध गु.र.नं. ११९/२०२५ भारतीय न्याय सहिता कलम ११८(१), १८९(२), १९१ (२), १९१(३) प्रमाणे गुन्हा दाखल केला आहे. महिला पोलीस नाईक कार्तिकी जाधव याप्रकरणी पुढील तपास करत आहे.
