विशेष प्रतिनिधी / मुंबई
पुण्यातील स्वारगेट बस स्थानकात एका २६ वर्षीय तरुणीवर बसमध्येच अत्याचार करण्यात आल्याची धक्कादायक घटना घडली आहे. या घटनेनंतर आक्रमक झालेल्या शिवसेनेचे (उद्धव बाळासाहेब ठाकरे) नेते वसंत मोरे यांनी स्वारगेट डेपोमधील सुरक्षा रक्षकांच्या केबीनची तोडफोड केली. यानंतर शिवसैनिकांनी सरकार विरोधात जोरदार घोषणाबाजी करत आंदोलन केलं. यावेळी स्वारगेट बस डेपोत शिवसेना महिला आघाडीच्या वतीनं जोरदार आंदोलन करण्यात आलं. “आम्हाला पंधराशे रुपये नको पण, सुरक्षा द्या” असं म्हणत या महिलांनी जोरदार आंदोलन करत राज्याचे मुख्यमंत्रीही असणारे गृहमंत्री देवेंद्र फडणवीस यांच्या राजीनाम्याची मागणी केली.
स्वारगेट डेपोमध्ये जिथं सुरक्षा रक्षकांची केबीन आहे. त्याच्या समोरच ही बस उभी होती. त्यामध्ये महिलेवर अत्याचाराची घटना घडली आहे. स्वारगेट आगारात २० सुरक्षा रक्षक असताना एका महिलेवर अन्याय झाला. ही निषेधार्य बाब आहे. म्हणून आम्ही तीव्र आंदोलन केलं, असं वसंत मोरे म्हणाले.
स्वारगेट बसस्थानकात एका २६ वर्षीय मुलीवर बलात्कार झाल्याची घटनेने महाराष्ट्र हादरला आहे. बुधवारी सकाळी साडेपाच वाजण्याच्या सुमारास ही घटना घडली. दत्तात्रेय रामदास गाडे असं आरोपीचं नाव आहे. पोलिसांनी आरोपीची ओळख पटवली असून त्याच्या शोधासाठी ८ पथकं रवाना केली आहेत.
या घटनेनंतर राज्यभर तीव्र प्रतिक्रिया उमटू लागल्या आहेत. ज्या स्वारगेटला ही घटना घडली तिथे बस स्थानकाच्या जवळच पोलीस चौकी आहे. शिवाय पोलीस कर्मचारी बस स्थानकावर वेळोवेळी गस्त घालत असतात. तरीही अशा पद्धतीचा घृणास्पद गुन्हा करण्याची आरोपीची हिंमत होते ही बाब गुन्हेगारांना कायद्याचा धाक उरलेला नाही हे दर्शविणारी आहे.
या राज्यात महिलांसाठी सुरक्षित जागा राहिलीच नाही का? असा प्रश्नही यानिमित्ताने उपस्थित झाला आहे. पुण्यात दररोज कुठे ना कुठे गंभीर गुन्हे घडतच आहेत. त्यांवर आळा घालण्यात गृह खात्याला यश आलेलं नाही. ही घटना म्हणजे कायदा सुव्यवस्थेची कशा पद्धतीने दुर्दशा झाली याचं उदाहरण आहे. या प्रकरणातील आरोपीला कठोरात कठोर शिक्षा झाली पाहिजे. यासाठी हा खटला फास्टट्रॅक कोर्टात चालवावा, अशी मागणी खासदार सुप्रिया सुळे यांनी केली आहे.
पीडित तरुणी पुण्यावरुन फलटणला जाण्यासाठी बसस्थानकावर आली. यावेळी संशयित आरोपीने तिला बस तिकडे लागली आहे, असं सांगून बसमध्ये नेलं. यावेळी नराधमाने बसमध्येत तिच्यावर बलात्कार केला. घटनेनंतर आरोपीने घटनास्थळावरुन पोबारा केला. हादरलेल्या तरुणीने आरडाओरडा केल्यानंतर ही घटना उघडकीस आली. याप्रकरणी स्वारगेट पोलीस ठाण्यात गुन्हा दाखल करण्यात आला आहे. आरोपीची ओळखही पटली असून आरोपीच्या शोधासाठी पोलिसांची आठ पथकं रवाना करण्यात आली आहेत, अशी माहिती पोलीस उपायुक्त स्मार्तना पाटील यांनी दिली.
