नाशिक, दि. ५ मार्च –
राज्याचे कृषिमंत्री माणिकराव कोकाटे यांना नाशिकच्या जिल्हा व सत्र न्यायालयाने दोन वर्षाची शिक्षा ठोठावली होती. बुधवारी (५ मार्च) न्यायालयाने या शिक्षेला कोकाटे बंधू विरोधात अपील चालेपर्यंत स्थगिती देण्याचे आदेश दिले आहे. त्यामुळे मंत्री कोकाटे यांच्यावरील शिक्षेचे बालंट तूर्तास तळले आहे.
१९९५ साली कागदपत्रात फेरफार आणि फसवणूक करून फ्लॅट लाटल्याप्रकरणी कोकाटे बंधू विरोधात न्यायालयात खटला सुरू होता. नासिक जिल्हा सत्र न्यायालयाने या खटल्यात कोकाटे यांना पन्नास हजार रुपये दंड आणि दोन वर्षांची शिक्षा ठोठावली होती. यासंदर्भात न्यायालयाने सरकारी वकील आणि कोकाटे यांच्या वकिलाची बाजू ऐकून घेत आपला निर्णय राखून ठेवला होता.
या संदर्भात १ मार्च रोजी न्यायालयाचे कामकाज होऊ शकले नाही त्यानंतर या प्रकरणावर निकाल देण्यासाठी न्यायालयाने आजची तारीख नेमली होती. तब्बल ३० वर्षाच्या कालावधीनंतर या खटल्याचा निकाल लागला होता.
मस्साजोग प्रकरणावरून चोहोबाजूने टीका झाल्यानंतर धनंजय मुंडे यांनी आपल्या मंत्रिपदाचा मंगळवारी राजीनामा दिला होता. त्यानंतर कोकाटे यांच्या संदर्भात न्यायालयाचा काय निर्णय येतो याकडे राजकीय वर्तुळाचे लक्ष लागले होते. न्यायालयाने सुनावण्यात आलेल्या शिक्षेला स्थगिती देण्याचे आदेश दिल्याने उपमुख्यमंत्री अजित दादांच्या आणखी एका एका मंत्र्यावरील मंत्रिपद गमविण्याचे बालंट तूर्तास टळले आहे. या निकालावर कोकाटे यांचे राजकीय भवितव्य अवलंबून होते.
