मुंबई, दि. २३ मार्च विशेष प्रतिनिधी
मुंबई महापालिका निवडणुकीच्या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे ॲक्शन मोडवर आले असून त्यांनी पक्षात मोठे संघटनात्मक बदल केले आहेत. मुंबई शहर अध्यक्षपदी संदीप देशपांडे यांची नियुक्ती करण्यात आली आहे. रविवारी रवींद्र नाट्यमंदिरात झालेल्या पक्षाच्या बैठकीत हा निर्णय घेण्यात आला.
या बैठकीत राज ठाकरे यांनी मनसेतील नवीन पदे आणि पदाधिकाऱ्यांची घोषणा केली. त्यानुसार विभाग अध्यक्ष असलेल्या मनसेत आता शहर अध्यक्ष आणि उप-शहर अध्यक्ष या नव्या पदांची निर्मिती करण्यात आली आहे.
राज ठाकरे यांनी सांगितले की, ही केंद्रीय समिती मनसेतील सर्व पदाधिकाऱ्यांच्या कारभारावर देखरेख ठेवेल. तसेच, कार्यकर्त्यांना कामाची आखणी २ एप्रिलपर्यंत मिळेल आणि शहर रचनेत कामांची विभागणी कशी करायची आणि काय नाही करायचे, हे सांगितले जाईल. ज्याला जे काम दिले आहे, त्याने तेच काम करायचे आहे, यामुळे भांडणे कमी होतील, अशा सूचना राज ठाकरे यांनी पदाधिकाऱ्यांना दिल्या.
या बदलांमुळे मनसेमध्ये नवीन ऊर्जा निर्माण होईल आणि आगामी निवडणुकांमध्ये पक्षाला फायदा होईल, अशी अपेक्षा व्यक्त केली जात आहे.
नवीन पदांची घोषणा –
* मुंबई शहर अध्यक्ष: संदीप देशपांडे
* दक्षिण मुंबई उपशहर अध्यक्ष: यशवंत किल्लेदार
* मुंबई पश्चिम उपनगर उपशहर अध्यक्ष: कुणाल माईणकर
* मुंबई पूर्व उपनगर उपशहर अध्यक्ष: योगेश सावंत
* मनसेच्या सर्व शाखाध्यक्षांची जबाबदारी: अमित ठाकरे
* मनसेच्या केंद्रीय समितीत स्थान: बाळा नांदगावकर, नितीन सरदेसाई, अविनाश अभ्यंकर आणि इतर नेते
