संगमनेर, दि. २७ मार्च – प्रतिनिधी
इंग्रजी माध्यमाच्या शिक्षण संस्थाकडून विद्यार्थ्यांना फी साठी वेठीस धरले जात असल्याचा तक्रारी वाढत आहे. या पार्श्वभूमीवर संगमनेर मधील शिक्षण सम्राटांनी विद्यार्थी पालकांना फी साठी वेठीस धरू नये, अन्यथा अशा शिक्षण संस्थांमधील भानगडी बाहेर काढण्याचा इशारा शिवसेनेचे (उद्धव बाळासाहेब ठाकरे) शहर प्रमुख रवींद्र कानकाटे यांनी दिला आहे.
कानकाटे यांनी म्हटले आहे की, सध्या विद्यार्थ्यांच्या तोंडी परीक्षा सुरू आहे. यादरम्यान संगमनेर मधील इंग्रजी माध्यमाच्या शाळा चालविणारे काही शिक्षण सम्राट, संस्थेचे अध्यक्ष, प्राचार्य नागरिकांना मुलांच्या फी करिता वेठीस धरत आहे. ज्या विद्यार्थ्यांकडे फी बाकी आहे, अशा विद्यार्थ्यांच्या पालकांना फोन करून दादागिरीच्या पद्धतीने बोलत जर फी भरली नाही तर तुमच्या मुलाची ओरल तोंडी परीक्षा घेणार नाही. तसेच तुमच्या मुलाला परीक्षेसाठी हॉल तिकीट मिळणार नाही अशा पद्धतीने दादागिरी सुरू आहे.
सध्या मार्च एंड सुरू असल्याने नागरिकांना बँकांचे कर्ज, हप्ते, घरपट्टी, नळपट्टी आदी विविध प्रकारच्या करांचा भरणा करावा लागत आहे. त्यामुळे संबंधित शाळाच्या प्राचार्य, संस्थाचालकांनी अशा परिस्थितीत अरेरावीची भाषा वापरू नये. पाल्य आणि त्यांच्या पालकांना सहकार्य करावे. आपल्या संस्थांच्या अटी नियम आम्हाला चांगल्या प्रकारे माहीत असून भानगडी बाहेर काढण्यास भाग पाडू नका असा इशारा कानकाटे यांनी दिला आहे.
