संगमनेर, दि. ३० मार्च – प्रतिनिधी
संगमनेर तालुक्यातील निळवंडे येथील जिल्हा परिषद प्राथमिक शाळेतील क्रीडापटू आणि अत्यंत हुशार विद्यार्थी साई भाऊसाहेब केरे याला शाळेत ये-जा करण्यासाठी सायकलची गरज होती. शाळेतील शिक्षक अनिल कडलग यांनी ही बाब लक्षात घेऊन व्हॉट्सॲपच्या माध्यमातून मदतीचे आवाहन केले.
साई केरे हा सातवीत शिकणारा विद्यार्थी अभ्यासात हुशार असून क्रीडा क्षेत्रातही त्याने विशेष प्राविण्य मिळवले आहे. लांब उडी, उंच उडी, धावणे, गोळा फेक, थाळीफेक यांसारख्या वैयक्तिक क्रीडा प्रकारांसह कबड्डी आणि खो-खो या सांघिक क्रीडा प्रकारातही त्याने जिल्हा पातळीवर यश मिळवले आहे. मात्र, साईची घरची परिस्थिती बेताची असल्याने त्याला शाळेत ये-जा करण्यासाठी अडचणी येत होत्या. शाळा आणि घर यांच्यातील दोन-तीन किलोमीटरचे अंतर तो दररोज पायी चालत असे.
पुढील वर्षी आठवीच्या शिक्षणासाठी आणि क्रीडा क्षेत्रात आणखी प्रगती करण्यासाठी साईला वडगाव पान येथील शाळेत जायचे आहे. मात्र, घरापासून शाळेचे सहा-सात किलोमीटरचे अंतर त्याला त्रासदायक वाटत होते. शिक्षक अनिल कडलग यांच्या आवाहनाला संगमनेरमधील डॉ. जोर्वेकर हॉस्पिटलच्या संचालिका शोभना जोर्वेकर यांनी तातडीने प्रतिसाद दिला. डॉ. शोभना जोर्वेकर आणि डॉ. अरविंद जोर्वेकर यांनी साईला नवीन सायकल देण्याची तयारी दर्शवली.
डॉ. जोर्वेकर यांचा मुलगा चिराग, जो दिल्ली एम्समध्ये वैद्यकीय शिक्षण घेत आहे, त्याने आपल्या पहिल्या पगारातील काही रक्कम सामाजिक कार्यासाठी देण्याची इच्छा व्यक्त केली होती. गुढीपाडव्याच्या शुभ मुहूर्तावर साईला सायकल मिळाल्याने त्याची गरज पूर्ण झाली आहे.
संगमनेरमधील क्रॉस व्हीलचे संचालक राहुल वर्पे आणि अमोल शेलकर यांनी हर्क्युलस कंपनीची सायकल वाजवी दरात उपलब्ध करून दिली. यावेळी शाळा व्यवस्थापन समितीचे माजी अध्यक्ष रावसाहेब वारे, पालक दत्तात्रय केरे, विलास पवार, किरण उकिर्डे आदी मान्यवर उपस्थित होते.
