महाराष्ट्र संवाद न्यूज – पुणे
दीनानाथ मंगेशकर रुग्णालयातील गर्भवती महिला तनिषा भिसे यांच्या दुर्दैवी मृत्यू प्रकरणी अखेर १७ दिवसानंतर पोलिसांनी मोठी कारवाई केली आहे. अलंकार पोलीस ठाण्यात रुग्णालयातील प्रमुख स्त्रीरोग तज्ज्ञ डॉ. सुश्रुत घैसास यांच्याविरुद्ध भारतीय दंड संहितेच्या कलम १०६(१) अंतर्गत गुन्हा दाखल करण्यात आला आहे. ससून रुग्णालयाच्या पुनर्तपासणी अहवालात डॉ. घैसास यांच्या वैद्यकीय निष्काळजीपणाचा स्पष्ट उल्लेख करण्यात आला आहे. याच अहवालाच्या आधारावर पोलिसांनी ही कारवाई केली आहे.
पोलीस आयुक्तालयाने दिलेल्या माहितीनुसार, पोलिसांनी ससून प्रशासनाला विचारलेल्या चार प्रश्नांचा अहवाल आज प्राप्त झाला. या अहवालात डॉक्टरांनी वैद्यकीय निष्काळजीपणा केल्याचे नमूद आहे, त्यानुसार गुन्हा दाखल करण्यात आला आहे.
या संदर्भात अधिक माहिती देताना पोलीस उपायुक्त संभाजी कदम म्हणाले, “ससून हॉस्पिटलकडून मागवलेल्या दुसऱ्या अहवालात आणि बी. जे. मेडिकल कॉलेजच्या अहवालानुसार डॉ. घैसास यांनी उपचारामध्ये निष्काळजीपणा आणि हलगर्जीपणा दाखवून वेळ घालवला, असे स्पष्टपणे नमूद आहे. त्यामुळे त्यांच्याविरुद्ध गुन्हा दाखल करण्यात आला आहे. या प्रकरणाचा पुढील तपास कायद्यानुसार केला जाईल. शासनाच्या नियमांनुसार ही कारवाई करण्यात आली आहे. डॉ. घैसास यांची भूमिका या प्रकरणात दिसत आहे आणि त्यानुसार त्यांच्यावर कारवाई करण्यात आली आहे. लवकरच डॉ. घैसास यांचा जबाब नोंदवला जाईल आणि त्यानंतर पुढील माहिती दिली जाईल.”
दरम्यान, सात महिन्यांची गर्भवती असलेल्या तनिषा भिसे यांना पोटात तीव्र वेदना आणि उच्च रक्तदाब जाणवल्याने २१ मार्च २०२५ रोजी इंदिरा हॉस्पिटलमध्ये दाखल करण्यात आले होते. पुढील उपचारांसाठी २८ मार्च रोजी त्यांना दिनानाथ मंगेशकर रुग्णालयात हलवण्याचा निर्णय घेण्यात आला. पूर्वी डॉ. सुश्रुत घैसास यांच्याकडे उपचार घेतलेले असल्याने त्यांच्यावर विश्वास ठेवून भिसे कुटुंबीयांनी हा निर्णय घेतला होता. मात्र, कुटुंबीयांच्या आरोपानुसार, गंभीर अवस्थेत असूनही रुग्णालयात तब्बल साडेपाच तास कोणतेही तातडीचे उपचार सुरू करण्यात आले नाहीत.
पीडित कुटुंबाने असाही आरोप केला आहे की, रुग्णावर तातडीने उपचार सुरू करण्याऐवजी रुग्णालय प्रशासनाने १० लाख रुपये एनआयसीयू डिपॉझिट भरल्याशिवाय त्यांना दाखल करण्यास नकार दिला. याच विलंबामुळे तनिषा यांची प्रकृती अधिक बिघडली आणि ३१ मार्च रोजी मणिपाल रुग्णालयात त्यांचा मृत्यू झाला.
ससून रुग्णालयाच्या पुनर्तपासणी अहवालातही डॉ. घैसास यांच्या हलगर्जीपणामुळे तनिषा भिसे यांच्यावर वेळेत उपचार होऊ शकले नाहीत, असे स्पष्टपणे नमूद करण्यात आले आहे. त्यामुळे त्यांच्या मृत्यूला डॉ. घैसास यांचा वैद्यकीय निष्काळजीपणा कारणीभूत ठरला असून त्यांच्यावर गुन्हा दाखल करण्यात आला आहे.
या घटनेमुळे वैद्यकीय क्षेत्रात मोठी खळबळ उडाली असून, संबंधित दिनानाथ मंगेशकर रुग्णालयावरही चौकशीची मागणी जोर धरू लागली आहे. दुसरीकडे, मृत तनिषा भिसे यांच्या कुटुंबीयांनी न्यायासाठी संघर्ष सुरू ठेवण्याचा निर्धार व्यक्त केला आहे. आता या प्रकरणात पोलीस आणि प्रशासन काय कारवाई करतात याकडे संपूर्ण राज्याचे लक्ष लागलेले आहे.
