संगमनेर – प्रतिनिधी
संगमनेर बस स्थानकामध्ये प्रवाशांच्या सुरक्षिततेसाठी उभारण्यात आलेली सीसीटीव्ही यंत्रणा देखभालीअभावी बंद पडली होती. संगमनेर विधानसभा मतदारसंघाचे नवनिर्वाचित आमदार अमोल खताळ पाटील यांनी याची तातडीने दखल घेत राज्याचे परिवहन मंत्री प्रताप सरनाईक यांच्याकडे पत्रव्यवहार केला होता. या प्रयत्नांना यश आले असून, लवकरच संगमनेर एसटी स्थानकातील बंद पडलेली सीसीटीव्ही यंत्रणा पुन्हा सुरू होणार असल्याचे माहिती आमदार खताळ यांच्या संपर्क कार्यालयाकडून देण्यात आली आहे.
परिवहन मंत्री प्रताप सरनाईक यांनी आमदार खताळ यांच्या मागणीची दखल घेत एसटी महामंडळाच्या व्यवस्थापकीय संचालकांना योग्य ते निर्देश दिले. त्यानुसार, एमएसआरटीसीच्या आयटी विभागाने संगमनेर बस डेपोत नवीन सीसीटीव्ही कॅमेरे बसवण्यासाठी ई-निविदा प्रक्रिया पूर्ण केली आहे. तसेच, TCIL या सेवा पुरवठादाराची नियुक्ती करण्यात आली आहे.
7 मार्च 2025 रोजी परिवहन मंत्र्यांच्या अध्यक्षतेखाली झालेल्या बोर्ड बैठकीत या प्रस्तावाला मान्यता देण्यात आली असून कार्यादेशही जारी करण्यात आले आहेत. व्यापारी आणि आर्थिकदृष्ट्या महत्त्वाचे शहर असलेल्या संगमनेरमध्ये दररोज लाखो नागरिकांची वर्दळ असते. त्यामुळे महिला आणि नागरिकांच्या सुरक्षिततेसाठी नवीन सीसीटीव्ही यंत्रणा कार्यान्वित होणे अत्यंत महत्त्वाचे आहे, असे आमदार अमोल खताळ यांनी सांगितले.
एमएसआरटीसीद्वारे नवीन सीसीटीव्ही कॅमेरे बसवल्यानंतर या यंत्रणेची देखभाल आणि दुरुस्तीची जबाबदारी पोलीस प्रशासनाकडे सोपवण्यात येणार आहे. आमदार अमोल खताळ यांच्या प्रयत्नांमुळे प्रवाशांच्या सुरक्षिततेच्या दृष्टीने हे महत्त्वाचे पाऊल उचलले जात आहे.
