संगमनेर – प्रतिनिधी
अकोले आणि संगमनेर तालुक्यात राज्य उत्पादन शुल्क विभागाने अवैध मद्य विक्री करणाऱ्या केंद्रांवर १ मे २०२५ ते १८ मे २०२५ दरम्यान मोठी कारवाई करण्यात आली. राज्य उत्पादन शुल्क विभागाच्या भरारी पथक क्र. २, श्रीरामपूर आणि संगमनेर विभागाने संयुक्तपणे ही मोहीम राबवली गेली.
या कारवाईत अकोले तालुक्यातील हिवरगाव आंबरे, विरगाव फाटा, तांभोळ, अंभोळ, बेलापूर, आंबित, केळंगण, खिरविरे, लिंगदेव आणि राजूर तसेच संगमनेर तालुक्यातील अवैध मद्य विक्रीची ठिकाणे आणि ढाब्यांवर छापे टाकण्यात आले. या कारवाईत एकूण १९ गुन्हे दाखल करण्यात आले.
राज्य उत्पादन शुल्क विभागाने देशी दारू ३५०.१ बल्क लिटर, विदेशी दारू ४३.०२ बल्क लिटर, बीयर ९.५५ बल्क लिटर आणि ताडी १५० बल्क लिटर जप्त केली. जप्त केलेल्या मुद्देमालाची एकूण किंमत १,८४,९९०/- रुपये आहे. या प्रकरणी महाराष्ट्र दारूबंदी अधिनियम १९४९ अंतर्गत २० आरोपींविरुद्ध गुन्हे दाखल करण्यात आले आहेत.
ही कारवाई विभागीय उपआयुक्त सागर ढोमकर, अधीक्षक प्रमोद सोनोने आणि उपअधीक्षक प्रवीणकुमार तेली यांच्या मार्गदर्शनाखाली पार पडली. निरीक्षक अनुपकुमार देशमाने, निरीक्षक एस. के. सहस्रबुद्धे आणि त्यांच्या कर्मचाऱ्यांनी या मोहिमेत सहभाग घेतला.
अवैध हातभट्टी, गावठी दारू उत्पादन, वाहतूक, विक्री आणि अवैध ढाब्यांवर सतत कारवाई केली जाईल, असे राज्य उत्पादन शुल्क विभागाने स्पष्ट केले आहे.
