अहिल्यानगर –
अहिल्यानगरमधील एमआयडीसी पोलिस ठाण्यात कार्यरत असलेले सहायक पोलिस उपनिरीक्षक भाऊसाहेब गोविंद काळे यांच्या विरोधात लाच मागणी केल्याप्रकरणी गुन्हा दाखल करण्यात आला आहे. तोफखाना पोलिस स्टेशनमधील एका गुन्ह्यात आरोपी न करण्यासाठी त्यांनी ७०,००० रुपयांची लाच मागितल्याचा आरोप आहे.
मिळालेल्या माहितीनुसार, एका ३० वर्षीय व्यक्तीने अहिल्यानगरच्या लाचलुचपत प्रतिबंधक विभाग (ACB), अहमदनगर येथे तक्रार दाखल केली होती. त्यांच्या भावाने चोरीचे सोने विकत घेतल्याच्या आरोपाखाली तोफखाना पोलिस स्टेशनमध्ये गु.र.क्र. ५६९/२४, भा.द.वी. कलम ३९४, ३४ नुसार गुन्हा दाखल करण्यात आला होता. या गुन्ह्यात तक्रारदाराच्या भावाला आरोपी न करण्यासाठी, सहायक पोलिस उपनिरीक्षक काळे यांनी त्यांच्याकडे ७०,००० रुपयांची मागणी केली होती.
तक्रारीची शहानिशा करण्यासाठी ९ मे २०२४ रोजी पडताळणी करण्यात आली. त्यावेळी, पंचांसमक्ष काळे यांनी तक्रारदाराच्या भावाला गुन्ह्यात अटक होऊ नये यासाठी, सदर गुन्ह्यातील तपास अधिकारी यांच्या नावाचा बेकायदेशीर वापर करून ७०,००० रुपये लाचेची मागणी केली आणि ती स्वीकारण्याची तयारी दर्शवली.
या पडताळणीनंतर, भिंगार कॅम्प पोलिस स्टेशनमध्ये सहायक पोलिस उपनिरीक्षक भाऊसाहेब गोविंद काळे यांच्या विरोधात भ्रष्टाचार प्रतिबंध अधिनियम सन १९८८ च्या कलम ७ अन्वये गुन्हा दाखल करण्यात आला आहे. या प्रकरणाचा अधिक तपास लाचलुचपत प्रतिबंधक विभाग करत आहे.
