ग्रामसभेला उपस्थित असलेल्या सामान्य जनतेने गावाच्या विकासासाठी आलेल्या निधीच्या गैरवापराबाबत सरपंच आणि ग्रामसेवकांना जाब विचारला. मात्र, त्यांच्याकडे समाधानकारक उत्तरे नव्हती. प्रश्नांची सरबत्ती सुरू असताना, सत्ताधाऱ्यांकडून प्रश्न विचारणाऱ्यांनाच धमकावणे, धक्काबुक्की करणे असे प्रकार सुरू झाले. विकासकामांचे डोंगर उभे केल्याचे सांगणाऱ्या सत्ताधाऱ्यांचे एक-एक घोटाळे बाहेर येऊ लागताच, ते हमरी-तुमरीवर आले.
ग्रामस्थांनी सर्वच सदस्यांना धारेवर धरले असता, उपसरपंच बादशहा बोरकर आणि इतर सदस्यांनी आपली हतबलता बोलून दाखवली. “या ग्रामपंचायतीत कोणत्या वस्तू खरेदी केल्या जातात आणि कोणाला दिल्या जातात हे आम्हालाच कळत नाही. कोणता निधी कुठे वापरला जातो हेही सांगितले जात नाही. ग्रामपंचायत कर्मचाऱ्यांसाठी आलेला निधीही परस्पर दुसरीकडे वळवला जातो. वेगळ्याच माणसाच्या नावाने खाते उघडून त्यावर निधी वर्ग करून तोही पैसा लंपास केला जातो. छोट्या-छोट्या कामांचीही मोठी बिले काढली जातात,” असे धक्कादायक खुलासे त्यांनी केले.
