संगमनेरमध्ये चित्तथरारक दृश्य! बिबट्याने दिली चक्क कॅमेऱ्याला पोज, शिकार करून थेट शेतकऱ्यासमोर… बघा व्हिडिओ

संगमनेर, प्रतिनिधी: 

चित्रपटातील एखाद्या नायक-नायिकेला लाजवेल अशा थाटात कॅमेऱ्याला पोज देणाऱ्या एका बिबट्याचा व्हिडिओ सध्या सोशल मीडियावर धुमाकूळ घालत आहे. संगमनेर तालुक्यातील आश्वी खुर्द ते दाढ खुर्द रस्त्यावर न्याय दूध संस्थेच्या शेजारील शेतात ही थरारक घटना घडली, जिथे बिबट्या चक्क बगळ्यांची शिकार करण्यासाठी दबा धरून बसला होता.

बुधवारी (२५ जून) सायंकाळच्या सुमारास, आश्वी खुर्द येथील तरुण शेतकरी अभिषेक भवर हे आपल्या ट्रॅक्टरने शेतात नांगरणी करत होते. नांगरलेल्या शेतात बगळे किटकांना टिपत असताना, जवळच असलेल्या उसाच्या शेतात एक बिबट्या बगळ्यांची शिकार करण्याच्या तयारीत दबा धरून बसला होता. ट्रॅक्टर आणि उसाच्या शेतीतील अंतर केवळ पाच फुटांचे असतानाही, बिबट्याने अत्यंत शांतपणे दबा धरून होता.

या घटनेविषयी बोलताना शेतकरी अभिषेक भवर यांनी सांगितले, मी आजवर शेतात नांगरणी करताना अनेक बिबटे पाहिले आहेत. खरं तर तो एक वन्य प्राणी आहे आणि स्वतःच्या जीवाला घाबरून शिकार करताना मी त्याला अनेकदा पाहिले आहे. पण आजचा बिबट्या बहुधा खूप भुकेला असावा. त्याने एका झेपेत एक बगळा पकडला आणि शिकार फस्त करून तो पुन्हा माझ्या दिशेने येताना दिसला. त्यामुळे मी तात्काळ ट्रॅक्टर शेतातून बाहेर घेऊन निघालो. त्याचदरम्यान, मी माझ्या मोबाईलमध्ये त्याचा व्हिडिओ काढला. बिबट्याने चक्क एक मिनिटापर्यंत ‘शूटिंग’साठी पोज दिली. एका क्षणासाठी तो जागेवरून हटला नाही, तर उलट सरीत त्याने अभिषेकला फोटो काढण्याची संधी दिली.

बिबट्या दिसल्यास काय करावे? वन विभागाचा सल्ला…

बिबट्या दिसल्यास, घाबरून किंवा गोंधळून न जाता शांत राहण्याचा प्रयत्न करा. मोठ्याने आवाज करा. बिबट्याच्या जवळ जाण्याचा प्रयत्न करू नका. त्याला त्याच्या मार्गाने जाऊ द्या. जर तुम्ही सुरक्षित ठिकाणी असाल, तर तिथेच थांबा आणि बिबट्या निघून गेल्यावरच बाहेर पडा. बिबट्या दिसल्यास, त्वरित वनविभागाला संपर्क साधा आणि त्यांना माहिती द्या. – सुभाष सांगळे वनपरिक्षेत्र अधिकारी संगमनेर भाग ३.