राजशिष्टाचार पाळा अन्यथा नगरपालिकेला टाळे ठोकू! ‘या’ माजी नगराध्यक्षांचा पालिका प्रशासनाला इशारा

संगमनेर, प्रतिनिधी:

संगमनेरमधील गेल्या काही दिवसातील राजकीय घडामोडी बघता विधान परिषदेच्या सदस्यांबाबत योग्य राजशिष्टाचार पाळला नाही, तर थेट नगरपालिकेला टाळे ठोकू, असा निर्वाणीचा इशारा संगमनेरचे माजी नगराध्यक्ष विश्वास मुर्तडक यांनी पालिका प्रशासनाला दिला आहे.

संगमनेर शहरातच राहणारे नाशिक पदवीधर मतदारसंघाचे आमदार सत्यजित तांबे यांना नगरपालिका प्रशासन जाणूनबुजून डावलत असल्याच्या आरोपावरून हा इशारा देण्यात आला आहे.

महाराष्ट्र विधान परिषद हे राज्याच्या विधिमंडळातील वरिष्ठ सभागृह आहे आणि त्याचे सदस्य महत्त्वाचे संवैधानिक स्थान भूषवतात. त्यामुळे नगरपालिकेच्या विविध विकासकामांबाबत त्यांना निमंत्रित करणे आणि त्यांना सूचित करणे हे नगरपालिका प्रशासनाचे, मुख्याधिकाऱ्यांचे कर्तव्य आहे. मात्र गेल्या काही दिवसातील चित्र बघता असे घडताना दिसत नाही.

या पार्श्वभूमीवर मुर्तडक म्हणाले, जर नगरपालिका प्रशासन राजकीय दबावाखाली त्यांना जाणीवपूर्वक डावलत असेल, तर हा राज्यघटनेचा आणि राजशिष्टाचाराचा पूर्णपणे अपमान आहे. स्वाभिमानी संगमनेरकर हे कधीही सहन करणार नाहीत. पुन्हा असे घडल्यास, संगमनेर शहरातील सर्व नागरिक नगरपरिषदेला टाळे ठोकतील.

माजी नगराध्यक्षांच्या या थेट वक्तव्यामुळे पालिका प्रशासनाकडून राजशिष्टाचाराकडे दुर्लक्ष केले जात असल्याबद्दल पालिकेच्या माजी पदाधिकाऱ्यांमध्ये तसेच नागरिकांमध्ये असंतोष दिसून येत आहे. या प्रकरणामुळे लोकप्रतिनिधींच्या संवैधानिक पदाचा आदर करणे आणि राजकीय मतभेदांमुळे प्रशासकीय कर्तव्यात अडथळा न आणणे महत्त्वाचे असल्याचे अधोरेखित झाले आहे.

दरम्यान मुर्तडक यांच्या इशाऱ्यानंतर आता पालिका प्रशासन विविध विकास कामांच्या संदर्भाने होणाऱ्या कार्यक्रमांकडे काय भूमिका घेते याकडे लक्ष लागले आहे.