संगमनेर, प्रतिनिधी:
संगमनेर तालुक्यातील आरोग्य सुविधा अधिक सक्षम आणि नागरिकांना दर्जेदार उपचार उपलब्ध करून देण्यासाठी आज (सोमवारी, १४ जुलै) एक महत्त्वपूर्ण बैठक पार पडली. या बैठकीत संगमनेरच्या विविध आरोग्यविषयक प्रलंबित मागण्यांवर सविस्तर चर्चा करण्यात आली.
जलसंपदा मंत्री राधाकृष्ण विखे पाटील यांच्या अध्यक्षतेखाली झालेल्या या बैठकीला सार्वजनिक आरोग्य मंत्री प्रकाश आबिटकर यांच्यासह आमदार अमोल खताळ, माजी खासदार डॉ. सुजय विखे पाटील आणि आमदार विठ्ठलराव लंघे यांची प्रमुख उपस्थिती होती.
खताळ म्हणाले, बैठकीत संगमनेरच्या कॉटेज हॉस्पिटलमध्ये १०० खाटांचे अत्याधुनिक स्त्री रुग्णालय मंजूर करण्याच्या मागणीसह, घुलेवाडी येथील उपजिल्हा रुग्णालयाचे श्रेणीवर्धन करणे, तसेच चंदनापुरी, धांदरफळ खुर्द आणि तळेगाव दिघे येथील प्राथमिक आरोग्य केंद्रांमध्ये ग्रामीण रुग्णालय मंजूर करण्याबाबत महत्त्वपूर्ण विचारविनिमय झाला. याव्यतिरिक्त, संगमनेर नगर परिषद हद्दीतील खासगी रुग्णालयांना बॉम्बे नर्सिंग होम ॲक्ट अंतर्गत परवानगी देण्यासंदर्भात येणाऱ्या अडचणींवरही चर्चा करण्यात आली.
संगमनेरच्या आरोग्य सुविधा बळकट व्हाव्यात आणि नागरिकांना दर्जेदार उपचार सेवा मिळाव्यात, तसेच आरोग्याच्या लढाईत कोणीही दुर्लक्षित राहू नये यासाठी हे प्रयत्न सुरू आहेत. त्यांनी या सर्व मागण्या लवकरच पूर्णत्वास जाव्यात यासाठी सातत्याने पाठपुरावा सुरू असल्याचेही स्पष्ट केले. सार्वजनिक आरोग्य मंत्री प्रकाश आबिटकर यांनीही या मागण्यांवर सकारात्मकता दर्शवली आहे, यामुळे संगमनेरच्या आरोग्य क्षेत्राला मोठा दिलासा मिळण्याची अपेक्षा आहे.
या बैठकीला आरोग्य विभागाचे वरिष्ठ अधिकारी श्रीमती. कादंबरी बलकवडे (आयुक्त आरोग्य सेवा), डॉ. विजय कंदेवाड (संचालक – २), डॉ. सुनीता गोल्हाइत (सहाय्यक संचालक, रुग्णालय), डॉ. तुलसीदास सोळंके (वित्त अधिकारी), डॉ. कपिल आहेर (उपसंचालक, नाशिक), डॉ. संजय घोगरे (जिल्हा शल्य चिकित्सक, अहिल्यानगर) आणि डॉ. बापूसाहेब नागरगोजे (जिल्हा आरोग्य अधिकारी, अहिल्यानगर) आदी उपस्थित होते.
